اۆتوكولىكتەر تۋرالى قىزىقتى ماعلۇماتتار

قازىرگى تاڭدا اۆتوكولىكتەر تەك تاسىمالداۋشى قۇرال عانا ەمەس، قوعامدا ۇلكەن ءبىر ماڭىزدى فاكتورعا اينالىپ ۇلگەرگەنى بەلگىلى. ونىڭ قۋاتى، جىلدامدىعى، سىرت بەينەسى، باعاسى، ءنومىرى – يەسىنىڭ بەدەلىنىڭ كورىنىسى ىسپەتتەس. كۇن وتكەن سايىن اۆتوكولىكتەردىڭ جاڭا نۇسقالارى شىعارىلىپ، كەزىندە تەك فانتاستيكالىق فيلمدەردە كورىپ جۇرگەن مۇمكىندىكتەرى بۇگىندە اقيقاتقا اينالىپ وتىر.

ەندى وسى اۆتوكولىكتەرگە بايلانىستى سىزدەر بىلمەگەن بىرنەشە قىزىقتى ماعلۇماتتاردى ۇسىنامىز.

العاش ساعاتىنا 100 شاقىرىمدى باعىندىرعان اۆتوكولىك – ەلەكتروموبيل. ءبىر قىزىعى بۇل رەكورد سوناۋ 1899 جىلى ورناتىلعان بولاتىن.

ستيۆ دجوبس تەك قانا Mercedes-Benz SL 55 AMG ماركالى اۆتوكولىكتەرمەن جانە ءاردايىم ءنومىرسىز جۇرگەن ەكەن. كاليفورنيالىق زاڭناماعا سايكەس، اۆتوكولىكتىڭ ءنومىرىن راسىمدەۋگە 6 اي ۋاقىت كەتەدى، ال دجوبس SL 55 كولىكتەرىن ساتاتىن اۆتوسولونمەن ءار جارتى جىل سايىن ەسكىسىن قايتارىپ، جاڭاسىن ساتىپ الىپ وتىراتىن كەلىسىمشارتقا قول قويعان. ال اۆتوسالونعا التى اي سايىن ستيۆ دجوبس قايتارعان اۆتوكولىكتەر جاڭا باعاسىنان ەداۋىر قىمبات ساتىلىپ وتىرعان.

كوپتەگەن ەلدەردە رولگە ماس كۇيىندە وتىرعانى ءۇشىن جۇرگىزۋشىلەردى اكىمشىلىك جاۋاپكەرشىلىككە تارتىپ، جۇرگىزۋشى كۋالىگىنەن ايىرىپ تا  جاتادى. ال ۋرۋگۆايدا ماس كۇيىندە كولىك جۇرگىزىپ، جول اپاتىنا سەبەپكەر بولسا،  جازانى جەڭىلدەتەتىن جاعدايلارعا سانالادى ەكەن.

ال ەڭ جىلدام جۇك كولىگى - Hawaiian Eagle. ءورت سوندىرۋشىلەر كولىگى جىلدامدىعىن ساعاتىنا 655 شاقىرىعا دەيىن ارتتىرا الادى. اۆتوكولىك 1941 جىلى شىعارىلعان بولاتىن. امەريكالىق شەننون سەيدەل ونى 1995 جىلى قايتا جوندەۋگە كىرىسەدى. ءۇش جىلدان ارتىق ۋاقىتتا جوندەپ بولعاننان  كەيىن، 1998 جىلى جۇك كولىگى ەڭ جوعارعى جىلدامدىقتى كورسەتىپ، ەڭ جىلدام جۇك كولىگى رەتىندە گيننەس رەكوردتار كىتابىنا كىرگەن.

الەمدەگى ەڭ كىشكەنتاي اۆتوكولىكتەر سەرياسى – 1962 جىلى انگليادا شىعارىلعان Peel P50 كولىكتەرى بولىپ تابىلادى. ونىڭ ۇزىندىعى – 134 سم، ەنى – 99 سم، ال بيىكتىگى – 120 سم. اۆتوكولىكتىڭ ءۇش دوڭگەلەگى عانا بار، كابيناسىنا تەك جۇرگىزۋشى سيادى، ال جىلدامدىعىن ساعاتىنا 64 شاقىرىمعا دەيىن ارتتىرا الادى. سالماعى نەبىرى 59 كگ. اۆتوكولىكتەرگە سۇرانىس بولماعان سوڭ 1965 جىلعا دەيىن عانا شىعارىلعان.

“The Qazaq Times”