Қазіргі таңда автокөліктер тек тасымалдаушы құрал ғана емес, қоғамда үлкен бір маңызды факторға айналып үлгергені белгілі. Оның қуаты, жылдамдығы, сырт бейнесі, бағасы, нөмірі – иесінің беделінің көрінісі іспеттес. Күн өткен сайын автокөліктердің жаңа нұсқалары шығарылып, кезінде тек фантастикалық фильмдерде көріп жүрген мүмкіндіктері бүгінде ақиқатқа айналып отыр.

Енді осы автокөліктерге байланысты сіздер білмеген бірнеше қызықты мағлұматтарды ұсынамыз.

Алғаш сағатына 100 шақырымды бағындырған автокөлік – электромобиль. Бір қызығы бұл рекорд сонау 1899 жылы орнатылған болатын.

Стив Джобс тек қана Mercedes-Benz SL 55 AMG маркалы автокөліктермен және әрдайым нөмірсіз жүрген екен. Калифорниялық заңнамаға сәйкес, автокөліктің нөмірін рәсімдеуге 6 ай уақыт кетеді, ал Джобс SL 55 көліктерін сататын автосолонмен әр жарты жыл сайын ескісін қайтарып, жаңасын сатып алып отыратын келісімшартқа қол қойған. Ал автосалонға алты ай сайын Стив Джобс қайтарған автокөліктер жаңа бағасынан едәуір қымбат сатылып отырған.

Көптеген елдерде рөлге мас күйінде отырғаны үшін жүргізушілерді әкімшілік жауапкершілікке тартып, жүргізуші куәлігінен айырып та  жатады. Ал Уругвайда мас күйінде көлік жүргізіп, жол апатына себепкер болса,  жазаны жеңілдететін жағдайларға саналады екен.

Ал ең жылдам жүк көлігі - Hawaiian Eagle. Өрт сөндірушілер көлігі жылдамдығын сағатына 655 шақырыға дейін арттыра алады. Автокөлік 1941 жылы шығарылған болатын. Америкалық Шэннон Сейдел оны 1995 жылы қайта жөндеуге кіріседі. Үш жылдан артық уақытта жөндеп болғаннан  кейін, 1998 жылы жүк көлігі ең жоғарғы жылдамдықты көрсетіп, ең жылдам жүк көлігі ретінде гиннес рекордтар кітабына кірген.

Әлемдегі ең кішкентай автокөліктер сериясы – 1962 жылы Англияда шығарылған Peel P50 көліктері болып табылады. Оның ұзындығы – 134 см, ені – 99 см, ал биіктігі – 120 см. Автокөліктің үш дөңгелегі ғана бар, кабинасына тек жүргізуші сияды, ал жылдамдығын сағатына 64 шақырымға дейін арттыра алады. Салмағы небірі 59 кг. Автокөліктерге сұраныс болмаған соң 1965 жылға дейін ғана шығарылған.

“The Qazaq Times”