مۇناي قۇنى قۇلدىرادى

2 ماۋسىم كۇنى مۇنايدىڭ باعاسى وسىدان ءۇش اپتا بۇرىنعى دەڭگەيگە دەيىن قۇلدىرادى. قارا التىن قۇنىنىڭ بۇلاي قۇلدىراۋى اقش-تاعى مۇناي كولەمىنىڭ ارتۋى جانە پرەزيدەنت دونالد ترامپتىڭ پاريج كەلىسىمىنەن باس تارۋىمەن ءتۇسىنىدىرىلىپ وتىر. مۇنداي اقپاراتتى Dow Jones اگەنتتىگى حابارلادى.

سونىمەن الەمدەگى ەڭ ءوتىمدى Brent ماركاسى ICE Futures Europe-تا  2,88%-عا تومەندەپ،  باررەلى 49,17 دوللاردى قۇرادى. ال WTI مۇنايىنا جاسالعان كەلىسىم  2,83%-عا ازايىپ، 46,99 دوللاردان ساتىلىپ جاتىر، دەپ حابارلايدى پرايم.

ءبىر اپتا بۇرىن قارا التىن باعاسى اقش-تا ساقتاۋلى مۇناي كولەمىنىڭ ازايۋىنا بايلانىستى ءبىراز كوتەرىلگەن ەدى. الايدا 25 مامىرداعى وپەك جينالىسىنان كەيىن اقش ازايعان مۇنايدى قايتا تولتىرىپ ۇلگەردى.

"اقش-تاعى مۇناي كولەمىنىڭ ارتۋى نارىقتاعى ۇسىنىستى ارتتىرىپ جىبەردى. سوندىقتان جۇما كۇنى باعا 50 دوللاردان دا ارزانداپ كەتتى. بۇدان بولەك وسى ەلدىڭ پرەزيدەنتى دونالد ترامپتىڭ كليمات جونىندەگى پاريج كەلىسىمىنەن شىعۋى دا ىقپال ەتكەنىن ەسەپكە الۋ كەرەك", - دەيدى Global Risk Management مەنەدجەرى مايكل پوۋلسەن.

ايتا كەتەيىك، وسى اپتادا Brent ماركاسىنىڭ باعاسى 5%-عا دەيىن تومەندەگەن. ال ينۆەستورلار وپەك ەلدەرىنىڭ ءوندىرىس كولەمىن قىسقارتۋ ءۇشىن باسقا ارەكەت تانىتپاعانىنا تاڭدانىپ وتىر. "وپەك ۇسىنىسىنا قاتىستى قاۋىپ بۇرىنعىداي قالا بەرەدى", - دەيدى Commonwealth Bank of Australia ساراپشىسى ۆيۆەك دحار.

ايتا كەتەيىك، وسىدان ءبىر اپتا بۇرىن وپەك پەن وعان مۇشە ەمەس ەلدەر مۇناي كولەمىن قىسقارتۋ مەرزىمىن ۇزارتۋعا كەلىسكەن بولاتىن. دەگەنمەن كورىپ وتىرعانىمىزداي بۇل كەلىسىم باعانى رەتتەۋگە ەش اسەپ ەتە قويمايتىن سياقتى.

“The Qazaq Times”