قازاقستاندىقتاردىڭ كرەديت تولەۋگە شاماسى جوق

قازاقستاندا بانكتەردىڭ قارىز پورتفەلىنىڭ ساپاسى ناشارلاپ جاتىر. مۇنداي پىكىردى "كازكوممەرتس سەكيۋريتيز" ساراپشىسى دينارا تاڭىربەرگەنوۆا ايتىپ وتىر، دەپ حابارلايدى LS.

ونىڭ سوزىنشە، ءساۋىر ايىندا تولەۋ مەرزىمى 90 كۇننەن اسىپ كەتكەن كرەديتتەردىڭ ۇلەسى 7,7%-دان 8%-عا دەيىن وسكەن.

پروبلەمالى كرەديتتەرى ەڭ كوپ بانك - رەسەيلىك سبەربانكتىڭ قازاقستانداعى ەنشىلەسى  (13,7%) جانە اتف بانك (11%). ال تسەسنا بانكتە بولسا قارىز پورتفەلىنىڭ ساپاسى باسقالارعا قاراعاندا (4,8%) جوعارى. ال ورتا جانە شاعىن بانكتەردىڭ پروبلەمالى كرەديتتەرى ءىرى بانكتەرگە قاراعاندا الدەقايدا از (ۆتب بانك پەن قازاقستانداعى پاكىستان بانكىن قوسپاعاندا).

ساراپشى 2017 جىلدىڭ ءتورت ايىنداعى كرەديتتەر مەن دەپوزيتتەردىڭ ءوسىمى وتە تومەن ەكەنىن ايتادى. كرەديت ينەرتسياسىنا ۆاليۋتا كۋرسىنان بولەك اقشا-نەسيە ساياساتى نارىعىنداعى مولشەرلەمەلەردىڭ جوعارى بولۋى، ال دەپوزيت مولشەرىنىڭ تومەن بولۋىنا بانكتەردىڭ بالانسىنداعى وتىمدىلىكتىڭ شامادان ارتىق كولەمى اسەر ەتىپ وتىر. ءبىزدىڭ ويىمىزشا، وسى جىلى كرەديت ءوسىمى 4-6% دەڭگەيىندە بولادى", - دەيدى ساراپشى.

دينارا تاڭىربەرگەنوۆانىڭ مالىمەتىنشە، كرەديت نارىعىنداعى جاعداي قايتا قالىپقا كەلە باستاعان. ءساۋىر ايىندا بەرىلگەن قارىز كولەمى 0,3%-عا وسكەن. دەگەنمەن وتكەن ءتورت ايدىڭ قورىتىندىسى بويىنشا بەرىلگەن قارىز كولەمى (-1,4%) كەمىگەن.

"بانكتەر ءالى كرەديت بەرۋگە قىزىعۋشىلىق تانىتىپ وتىرعان جوق. ولار اقشا-نەسيە نارىعى مەن قۇندى قاعازدار نارىعىن ەسەپكە الىپ وتىر", - دەيدى ول.

ازىرگە قارىز پورتفەلىنىڭ ءوسىمى حالىق بانككە (+2,2% م-ك-م) تيەسىلى، ال  ۆDelta bank-ءتىڭ كورسەتكىشى (-6,5%) مۇلدە تومەندەپ كەتكەن.

ايتا كەتەيىك، 22 مامىر كۇنى ۇلتتىق بانك   «Delta Bank» اق-تىڭ جەكە جانە زاڭدى تۇلعالاردىڭ دەپوزيتتەرىن قابىلداۋعا، جەكە جانە زاڭدى تۇلعالاردىڭ بانك شوتتارىن اشۋعا ليتسەنزياسىن توقتاتا تۇرۋ تۋرالى شەشىم قابىلداعان بولاتىن.

“The Qazaq Times”