كۇنكورىس دەڭگەيى ءبىراز كوتەرىلدى

2017 جىلدىڭ مامىر ايىندا قازاقستانداعى ەڭ تومەنگى كۇنكورىس دەڭگەيى 23,2 مىڭ تەڭگەگە دەيىن كوتەرىلدى. بۇل تۋرالى ستاتيستيكا كوميتەتى حابارلادى. 

ءبىر ايدا كورسەتكىش 1,9%-عا، ال جىل باسىنان بەرى 7,9%-عا ۇلعايعان.

ەڭ تومەنگى كۇنكورىس دەڭگەيى حالىققا ەڭ قاجەتتى تاۋارلار باعاسىمەن ەسەپتەلەتىنىن ەسكەرسەك، مامىر ايىندا  ازىق-تۇلىككە 13,9 مىڭ تەڭگە، ال ازىق-تۇلىك ەمەس تاۋارلارعا 9,3 مىڭ تەڭگە قاجەت بولعان.

ستاتيستيكا كوميتەتىنىڭ مالىمەتىنشە، ماڭعىستاۋ وبلىسىندا بۇل كورسەتكىش 27,5 مىڭ تەڭگە، استانادا 27,2 مىڭ تەڭگە، الماتىدا 25,5 مىڭ تەڭگەنى قۇرادى. ال جامبىل وبلىسى مەن اقماولا وبلىسىنداعى كۇنكورىس دەڭگەيى باسقا وڭىرلەرمەن سالىستىرعاندا ءبىراز تومەن. جامبىل وبلىسىندا كورسەتكىش 20,7 مىڭ تەڭگەگە، اقمولا وبلىسىندا  20,8 مىڭ تەڭگەگە تەڭ.

ايتا كەتەيىك، بۇعان دەيىن ارنايى بەكىتىلگەن ازىق-تۇلىك سەبەتىنىڭ مينيمالدى باعاسى 6%-عا قىمباتتاعانى تۋرالى ايتىلعان. سونداي-اق، قر ۇلتتىق بانكتىڭ باعاعا قاتىستى جۇرگىزگەن ساۋالناماسىنا قاتىسقان رەسپوندەنتتەر الداعى ۋاقىتتا  باعا تاعى دا وسەدى دەپ پىكىر بىلدىرگەن. 

ال ەگەر نارىقتاعى ازىق-تۇلىك باعاسىنىڭ ءبىر ايدىڭ  وزىندە سان قۇبىلاتىنىن ەسكەرسەك، 23,2 مىڭ تەڭگەنىڭ جەتكىلىكسىز ەكەنىن اڭعارۋعا بولادى.

“The Qazaq Times”