زەينەتاقى قورىنىڭ بۇرىنعى باسشىسىن قاماۋ مەرزىمى تاعى ۇزارتىلدى

بىرىڭعاي جيناقتاۋشى زەينەتاقى قورىنىڭ بۇرىنعى توراعاسى رۋسلان ەردەناەۆتى قاماۋ مەرزىمى ماۋسىم ايىنىڭ سوڭىنا دەيىن ۇزارتىلدى. بۇل تۋرالى Sputnik قازاقستان سايتى حابارلادى. 

سوتتىڭ جارلىعىمەن قوردىڭ باسقارما توراعاسى رۋسلان ەردەناەۆ، بجزق تاۋەكەلدەرىن باسقارۋ دەپارتامەنتىنىڭ قارجىلىق تاۋەكەلدەرىن باسقارۋشى مۇسا باقىتوۆ، «الاتاۋمۋنايالتىن» اق باقىلاۋ كەڭەسىنىڭ توراعاسى باقىتجان كەنجەباەۆ جانە «بۋزگۋلاۋرۋم»  جشس ديرەكتورى ازات نايزاعارين 6 ايعا دەيىن، ياعني 2017 جىلدىڭ 28 ماۋسىمىنا دەيىن قاماۋدا بولادى.

ايتا كەتەيىك، جوعارىدا اتالعان ءتورت فيگۋرانتقا قاتىستى  قاماۋ مەرزىمىن ۇزارتۋ تۋرالى تاعى ءبىر شەشىم 2017 جىلدىڭ ناۋرىز ايىندا قابىلدانعان. ول كەزدە قاماۋداعىلاردىڭ مەرزىمى 28 ساۋىرگە دەيىن ۇزارتىلعان ەدى.

ەسكە سالايىق،  بجزق-نىڭ توپ مەنەدجەرلەرى ۇلتتىق قاۋىپسىزدىك كوميتەتىنىڭ (الماتى قالاسىنداعى دەپارتامەنتى) قور مەن «بۋزگۋل اۋرۋم» جشس اراسىنداعى وبليگاتسيالىق كەلىسىم-شارتقا قاتىستى سوتقا دەيىنگى تەكسەرۋ جۇمىستارىن جۇرگىزۋ كەزىندە ۇستالعان. باق-تىڭ حابارلاۋىنشا، قۇقىق قورعاۋ ورگاندارى «بۋزگۋل اۋرۋم» جشس-نىڭ وبليگاتسيالارىنا ينۆەستيتسيا سالۋ ارقىلى قوردان 5 ملرد تەڭگە جىمقىرىلعان دەگەن فاكت انىقتالعان.

“The Qazaq Times”