وتاندىق ءىت قىزمەتتى ۇسىناتىنداردىڭ قىزىعۋشىلىعىن قورعاۋ ءۇشىن ارنايى رەەستر قۇرىلۋ كەرەك. بۇل تۋرالى قر قورعانىس جانە اەروعارىش ونەركاسىبى مينيسترلىگى اقپاراتتىق قاۋىپسىزدىك كوميتەتى  توراعاسىنىڭ ورىنباسارى رۋسلان ابدىقالىقوۆ مالىمدەدى.

قازىرگى كەزدە "قازاقستاننىڭ كيبەرقاقپاسى"كيبەرقاۋىپسىزدىك تۇجىرىمداماسى دايىندالىپ جاتىر. ول ەكى كەزەڭ ارقىلى ىسكە قوسىلادى: ءبىرىنشىسى 2017-2018 جىلى جۇزەگە اسسا، ەكىنشىسى 2019-2020 جىلدارى جۇمىس ىستەيدى.

ءبىرىنشى كەزەڭدە اقپاراتتىق قاۋىپسىزدىك زاڭىن ورىنداۋ بويىنشا ءىس-تاجىريبە جۇرگىزىلەتىن بولادى. ودان كەيىن وزگەرىستەر ەنگىزىلە باستايدى. سونداي-اق، كاسىبي ستاندارتتار مەن ءبىلىم باعدارلامالارىنا تالداۋ جاسالىپ، كيبەرقاۋىپسىزدىك بويىنشا ماماندار دايىندالادى.

"وسى جىلى مەملەكەتتىك ورگاندارمەن بىرگە باعدارلامالاردى ساتىپ الۋعا 6 ملرد تەڭگە جۇمساۋ كوزدەلىپ وتىر. بۇل قارجى باعدارلاما قۇرالدارىن جەتكىزەتىن شەتەلدىكتەرگە بەرىلەتىنى بەلگىلى. ال وتاندىق باعدارلاما جاساۋشىلار مۇنى ارى قاراي دامىتۋ كەرەك. بىراق الدىمەن ولار شەتەلدىكتەرمەن باسەكەلەس بولا الاتىنداي شارتتار قۇرۋ كەرەك", - دەدى ابدىقالىقوۆ.

ونىڭ سوزىنشە، مينيسترلىكتەر جانە كوميتەتەر، ءتۇرلى ۆەدومستۆالار قولداناتىن باعدارلامالاردىڭ 4%-ى عانا قازاقستاندىقتاردىكى ەكەن. سوندىقتان باعدارلاما جاساۋشىلاردىڭ ۇلتتىق رەەسترى قۇرىلاتىن بولادى. ەگەر باعدارلاما جاساۋشى ءوزىنىڭ ءونىمىنىڭ ءتيىمدى ەكەنىن جانە بارلىق ستاندارتتارعا ساي ەكەنىن دادەلدەي السا، وندا مەملەكەت ونىڭ باعدارلاماسىن ساتىپ الادى. وسىلايشا ولار مەملەكەتتەن العاشقى كاپيتال الىپ، شەتەلدىك وندىرۋشىلەرمەن باسەكەلەس بولا الادى.

سونداي-اق، تۇجىرىمداما اياسىندا بيزنەس سۋبەكتىلەرى مەن مەملەكەتتىك ورگاندارنا جاسالعان كيبەرشابۋىلدار تۋرالى اقپارات الاتىن ۇلتتىق كوورديناتسيا ورتالىعى قۇرىلادى. بۇل ءجيى جاسالاتىن شابۋىلدار ستاتيستيكاسىن ءبىلىپ وتىرۋ ءۇشىن قاجەت.

“The Qazaq Times”