قىتاي اۋعانستاننىڭ ۇلتتىق قاۋىپسىزدىك كەڭەسىنە حاكەرلىك شابۋىل جاساعان. فوتو: Penetration Testing

قىتاي اۋعانستان ۇلتتىق قاۋىپسىزدىك كەڭەسىنىڭ كوميۋتەرلىك جۇيەسىنە كىرۋ ءۇشىن حاكەرلىك شابۋىل جاساعان. بۇل ارەكەت ورتالىق ازيا ەلدەرىنە باعىتتالعان قىتايدىڭ كيبەر-شپيوندىق ناۋقانى اياسىندا جۇزەگە اسىرىلعان. بۇل تۋرالى كيبەر-قاۋىپسىزدىك ماسەلەلەرىمەن اينالىساتىن Check Point كومپانياسى مالىمدەدى.

اتالعان كومپانيانىڭ زەرتتەۋشىلەرى جاريالاعان ەسەپتە اۋعانستان ۇلتتىق قاۋىپسىزدىگىنە كيبەرشابۋىل جاساعان قىتاي ءتىلدى حاكەرلىك توبىن «IndigoZebra» دەپ اتاعان. Check Point  كومپانياسى بۇل حاكەرلىك توپتىڭ 2014 جىلدىڭ وزىندە قىرعىزستان مەن وزبەكستانداعى ساياسي ۇيىمدارعا باعىتتالعان كيبەر شابۋىلداردى جۇزەگە اسىرعانى تۋرالى دەرەكتەردى كەلتىرگەن.

مالىمەتتەردە ايتىلۋىنشا، اۋعانستانعا باعىتتالعان حاكەرلىك وپەراتسيالار ءساۋىر ايىنىڭ باس شەنىندە باستالعان. حاكەرلەر اۋعانستان پرەزيدەنتىنىڭ كەڭسەسىندەگى لاۋازىمدى تۇلعا رەتىندە ۇلتتىق قاۋىپسىزدىك كەڭەسىنىڭ جۇيەسىنە كىرگەن. وعان دەيىن حاكەرلەر اۋعانستان پرەزيدەنتى اپپاراتۋراسىنداعى لاۋازىمدى تۇلعانىڭ ەلەكتروندى پوشتاسىن اشىپ، سول ارقىلى وزگە جوعارى لاۋازىمدى تۇلعالارعا جانە باسقا دا قۇزىرلى مەكەمەلەرگە حاتتار جولداپ وتىرعان.

Check Point  كومپانياسى ماماندارىنىڭ سوزىنشە بۇنداي ءتاسىل ارقىلى جاسالعان كيبەر شابۋىلداردىڭ زاردابى اۋىر بولادى. بۇل كەز-كەلگەن تۇلعانى ءوزى ءۇشىن كەز-كەلگەن ءىستى ورىنداتۋعا دەيىن اپاراتىن ءتاسىل. بۇنداي تۇلعانىڭ ورنىندا جوعارى لاۋازىمدىلار تۇراتىن بولسا ونىڭ زاردابىن ەلەستەتۋ قيىن دەپ سانايدى.

مالىمەتكە سەنسەك، بۇل اۋعانستانعا باعىتتالعان قىتايدىڭ العاشقى اۋقىمدى كيبەر شابۋىلى. بۇعان دەيىن Check Point  كومپانياسى جوعارىدا اتالعان حاكەرلىك توپتىڭ شىڭجاڭداعى ۇيعىرلارعا قاتىستى حاكەرلىك شابۋىلدار جاساعانىن اشكەرلەگەن ەدى. Check Point زەرتتەۋشىلەرىنىڭ ايتۋىنشا، بۇل بىرىنەن سوڭ ءبىرى جاسالعان كيبەرشابۋىلدار قىتايدىڭ باتىس شەكاراسىندا كيبەرشپيوناجدى كۇشەيتكەندىگىن كورسەتەدى.

ەڭ قىزىعى، اتالعان كيبەر-قاۋىپسىزدىك كومپانياسى «IndigoZebra» حاكەرلىك توبى ورتا ازياداعى وزگە ەلدەردە دە كيبەر-شابۋىلداردى جۇزەگە اسىرعان بولۋى مۇمكىن ەكەنىن ايتادى.

“The Qazaq Times”