Otandıq İT qızmetti wsınatındardıñ qızığuşılığın qorğau üşin arnayı reestr qwrılu kerek. Bwl turalı QR Qorğanıs jäne aeroğarış önerkäsibi ministrligi aqparattıq qauipsizdik komiteti  törağasınıñ orınbasarı Ruslan Äbdiqalıqov mälimdedi.

Qazirgi kezde "Qazaqstannıñ kiberqaqpası"kiberqauipsizdik twjırımdaması dayındalıp jatır. Ol eki kezeñ arqılı iske qosıladı: birinşisi 2017-2018 jılı jüzege assa, ekinşisi 2019-2020 jıldarı jwmıs isteydi.

Birinşi kezeñde aqparattıq qauipsizdik zañın orındau boyınşa is-täjiribe jürgiziletin boladı. Odan keyin özgerister engizile bastaydı. Sonday-aq, käsibi standarttar men bilim bağdarlamalarına taldau jasalıp, kiberqauipsizdik boyınşa mamandar dayındaladı.

"Osı jılı memlekettik organdarmen birge bağdarlamalardı satıp aluğa 6 mlrd teñge jwmsau közdelip otır. Bwl qarjı bağdarlama qwraldarın jetkizetin şeteldikterge beriletini belgili. Al otandıq bağdarlama jasauşılar mwnı arı qaray damıtu kerek. Biraq aldımen olar şeteldiktermen bäsekeles bola alatınday şarttar qwru kerek", - dedi Äbdiqalıqov.

Onıñ sözinşe, ministrlikter jäne komiteter, türli vedomstvalar qoldanatın bağdarlamalardıñ 4%-ı ğana qazaqstandıqtardiki eken. Sondıqtan bağdarlama jasauşılardıñ wlttıq reestri qwrılatın boladı. Eger bağdarlama jasauşı öziniñ öniminiñ tiimdi ekenin jäne barlıq standarttarğa say ekenin dädeldey alsa, onda memleket onıñ bağdarlamasın satıp aladı. Osılayşa olar memleketten alğaşqı kapital alıp, şeteldik öndiruşilermen bäsekeles bola aladı.

Sonday-aq, twjırımdama ayasında biznes sub'ektileri men memlekettik organdarna jasalğan kiberşabuıldar turalı aqparat alatın wlttıq koordinaciya ortalığı qwrıladı. Bwl jii jasalatın şabuıldar statistikasın bilip otıru üşin qajet.

“The Qazaq Times”