بىرىڭعاي جيناقتاۋشى زەينەتاقى قورىنىڭ ينۆەستيتسيالىق پورتفەل جونىندەگى ەسەبىندە قور اكتيۆتەرىنىڭ  71,3 ملرد تەڭگەسى ازەربايجاننىڭ حالىقارالىق بانكىنىڭ وبليگاتسيالارى ءۇشىن سالىنعانى ايتىلعان. ال 12 مامىر كۇنگى Bloomberg اگەنتتىگىنىڭ مالىمەتىنشە، ازەربايجاننىڭ حالىقارالىق بانكى ەلدەگى ۆاليۋتالىق داعدارىس پەن ۆاليۋتانىڭ جەتىسپەۋشىلىگىنە بايلانىستى سىرتقى قارىزدارىن تولەۋدى توقتاتقان جانە كرەديت بەرۋشىلەرمەن كەلىسسوز جۇرگىزۋدى باستايدى. ياعني ولار وزدەرىن بانكروت دەپ جاريالاپ وتىر.

وسىعان قاتىستى ەكونوميست راقىم وشاقباەۆ ءوزىنىڭ فەيسبۋك پاراقشاسىندا زەينەتاقى اكتيۆتەرىنىڭ ساقتالۋنا قاتىستى الاڭداۋشىلىق ءبىلدىرىپ وتىرعانىن جازدى.

«زەينەتاقى اكتيۆتەرىنىڭ ساقتالۋىنا ايتارلىقتاي قاۋىپ ءتونۋى مۇمكىن. تاۋەكەلدەرى جوعارى اكتيۆتەر ءۇشىن (ازەربايجاننىڭ حالىقارالىق بانكىنىڭ Moody’s اگەنتتىگى ۇسىنعان كرەديتتىك رەيتينگى ۆ ) حالىقتىڭ زەينەتاقى اكتيۆتەرىن ورنالاستىرۋ شەشىمىن كىم قابىلدادى دەگەن سۇراق تۋىندايدى. زەينەتاقى اكتيۆتەرىن ءتيىمسىز باسقارۋ ماسەلەسى قوعامدىق پىكىرتالاسقا اينالاتىنى انىق»، — دەپ جازدى ول ءوز پاراقشاسىندا.

ينتەرفاكس-ازەربايجان اگەنتتىگىنىڭ مالىمەتىنشە، احب بانكروت بولعانى تۋرالى ءوتىنىشتى نيۋ-يورك سوتىنا جىبەرگەن. بانك مۇنداي ءوتىنىشتى مىندەتتى قايتا قۇرىلىمداۋ پروتسەستەرىن ورىنداۋ ماقساتىندا جانە الداعى ۋاقىتتا احب اكتيۆتەرىنە قاتىستى كرەديت بەرۋشىلەر تاراپىنان بولاتىن شاعىم تالاپتارعا بايلانىستى جىبەرىپ وتىر.

«بۇل ءوتىنىش سوت تاراپىنان قامتاماسىز ەتىلگەن. مۇنداي شەشىم ءبىزدىڭ قايتا قۇرالىمداۋ پروتسەسىنىڭ ءساتتى اياقتالۋى ءۇشىن جاسالعان دۇرىس قادام ەكەنىن كورسەتەدى»، - دەپ مالىمدەدى احب باسقارما توراعاسى حاليد احادوۆ.

ياعني اتالعان بانككە قارىز بەرگەندەر سىرتقى قارىز مىندەتتەرىن ءوز ەركىمەن قايتا قۇرىلىمداۋ كەزىندە بانك اكتيۆتەرىنە قاتىستى ەشبىر تالاپ قويا المايدى.

“The Qazaq Times”