فوتو: gb.by

ۇلتتىق بانك  زەينەتاقى اكتيۆتەرىن باسقارۋ بويىنشا شەتەلىك كومپانيالاردىڭ بىرىنە 150 ملن دوللار بەرۋگە دايىندالىپ جاتىر. بۇل تۋرالى بىرىڭعاي جيناقتاۋشى زەينەتاقى قورىنىڭ توراعاسى ءنۇربۇبى ناۋرىزباەۆا مالىمدەدى. 

ونىڭ سوزىنشە، زەينەتاقى اكتيۆتەرىن باسقارۋعا قاتىستى قازىرگى كەزدە زاڭنامالاردا ەشقانداي وزگەرىستەر قابىلدانباعان.

"قازىرگى كەزدە زەينەتاقى اكتيۆتەرىن سول زاڭدى بەلگىلەنگەن ءتارتىپ بويىنشا ۇلتتىق بانك باسقارادى. ۇلتتىق بانك زەينەتاقى اكتيۆتەرىنىڭ ءبىراز بولىگىن شەتەلدىك باسقارۋشى كومپانيالارىنا بەردى. بۇل ۇلتتىق بانك پەن ءبىزدىڭ ارامىزداعى كەلىسىم  بويىنشا بولعان. يندەكستىك ينۆەستيتسيا دەيمىز، سونداي جوسپارلار بويىنشا ءبىر كومپانياعا 400 ملن دوللار كولەمىندە باسقارۋعا بەرىلدى. بۇل قوسىمشا باسقارۋ دەپ اتالادى", - دەدى ول.

وسىلاي دەگەن توراعا ارتىنشا شارت بويىنشا باسقارۋعا 400 ملن دوللار بەرۋگە بولاتىنىن جانە قازىرگى كەزدە 150 ملن دوللار بەرۋگە دايىندالىپ جاتقانىن ايتتى.

دەسەك تە 150 ملن دوللار قانداي كومپانيانىڭ باسقارۋىنا بەرىلەتىنى تۋرالى ازىرگە بەلگىسىز.  سەبەبى ول جونىندە الداعى ۋاقىتتا ۇلتتىق بانكپەن ناقتىلاناتىن بولادى.

بۇدان بولەك ءنۇربۇبى ناۋرىزباەۆا پروبلەمالى بانكتەردەگى قازاقستاندىقتاردىڭ زەينەتاقى جيناقتارى قانشا ەكەنىن اتاپ ءوتتى. ونىڭ سوزىنشە، 49 ملرد تەڭگە Bank RBK شوتىندا ساقتالعان. الايدا ول قاراجاتتىڭ قايتپاي قالۋ قاۋپى جوق.

"Delta bank پەن قازينۆەستبانكتە زەينەتاقى اكتيۆتەرى بولعان جوق. Bank RBK-دا ساۋىقتىرۋ باعدارلاماسى ەسەبىنەن 49 ملرد تەڭگە زەينەتاقى اكتيۆى بار. الايدا ۇلتتىق بانك قابىلداپ جاتقان ساۋىقتىرۋ باعدارلاماسىنان كەيىن قاراجاتتىڭ قايتارىلماي قالۋ قاۋپىن كورىپ تۇرعان جوقپىز", - دەدى ول.

ايتا كەتەيىك، سوڭعى ۋاقىتتا اتالعان بانككە قاتىستى قارجى ماسەلەلەرى تۋىنداعان بولاتىن. سەبەبى Bank RBK قىزمەتىن قولدانۋشىلار اقشا شەشىپ الۋ مۇمكىن بولماعانى جانە كەيبىر ستۋدەنتتەر ستيپەنديالارىن الا الماعاندارى تۋرالى ايتقان. وسى جاعدايلاردان كەيىن اتالعان بانكتىڭ ۇلتتىق بانكتىڭ ساۋىقتىرۋ باعدارلاماسىنا قاتىساتىنى بەلگىلى بولدى.

“The Qazaq Times”