"يسلام مەملەكەتى" ۇيىمى كرەملگە جەڭىس كۇنىنە وراي "تارتۋ" جولدادى

«ۇلى جەڭىسى» دەپ اتالىپ كەلگەن، ەكىنشى دۇنيەجۇزىلىك سوعىستىڭ ەۋروپا سوعىس مايدانىنداعى كەڭەس وداعىنىڭ جەڭىسىنە 72 جىل تولدى. اقش «SITE» بارلاۋ گرۋپپاسىنىڭ (SITE Intelligence Group) 9 مامىرداعى جاريالاعان حابارىنا قاراعاندا، جاقىندا «يسلام مەملەكەتى» ەكسترەميستىك ۇيىمى ارناۋلى ۆيدەو ماتەريال تاراتقان. ۆيدەودا ءسۇريادا لاڭكەستەر جاعىنان تۇتقىندالعان رەسەيلىك بارلاۋ اگەنتى ەۆگەني پەترەنكونى ازاپتاپ ولتىرىلگەنى تۇسىرىلگەن. قولعا تۇسكەن رەسەيلىك اگەنتتىك باسىن كەسىپ، ۇرەيلى سوزدەر سويلەگەن لاڭكەستەر بۇل ارەكەتىن «ۇلى جەڭىسكە جاساعان تارتۋىمىز» دەگەن.

الايدا، بۇل حابار تارالا سالىسىمەن رەسەي قورعانىس مينيسترلىگى مەن فەدەرالدىق قاۋىپسىزدىك قىزمەتى بۇل اقپاراتتى تەرىسكە شىعاردى. رەسەي ۇكىمەتىنىڭ اقپارات وكىلى «كومسومولسكايا پراۆدا» باسىلىمىنىڭ سۇحباتىن قابىلداعاندا «بۇل ۆيدەو ماتەريال تۋرالى ايتىلعانداردىڭ ءبارى دە بىلجىراق» دەگەن پىكىرىن ايتتى.

تيتردا ورىس تىلىندە تۇسىندىرمە بەرىلگەن ۆيدەونىڭ ۇزاقتىعى 12 مينۋت. قارا كيىمدى ەر ادامنىڭ قۇم ۇستىندە تىزەرلەپ وتىرعانىن كورۋگە بولادى. بۇل ادامنان باسقا رەسەيلىك ارنايى قىزمەتكەرلەر تۋرالى سۇراقتار سۇراپ جاتقانىن بىلۋگە بولادى. ال، ونىڭ باسىن شاباردان بۇرىن ونى كەلەمەجدەگەن، قورلاعان سوزدەر ايتىلادى. ازىرگە بۇل دايىندالعان بەينە ماتەريالدىڭ تۇپنۇسقاسى تابىلىپ انىقتالمادى. سونداي-اق، وقيعانىڭ ناقتى قاي كەزدە بولعانى دا بەلگىسىز. تەك «يسلام مەملەكەتى» لاڭكەستەرى بۇل ەر ادامدى وسىدان بۇرىن قولعا تۇسكەن رەسەيلىك بارلاۋ اگەنتى دەپ كورسەتەدى.

بۇل بەينە ماتەريالدى تەرىستەگەن رەسەي ۇكىمەتىنىڭ اقپارات وكىلى بىرنەشە دالەل كورسەتتى. بىرىنشىدەن، ۆيدەودا ءسوز بولعانداي، پەترەنكوعا تيەسەلى «فەدەرالدىق قاۋىپسىزدىك كوميتەتىنىڭ ەكىنشى دۇنيە سوعىسى جونىندەگى باسقارماسى» دەگەن مۇنداي ۇيىم اتىمەن جوق. ەكىنشىدەن، رەسەي بارلاۋ اگەنتتىكتەرىندە شتاتتان تىس قىزمەتكەرلەردە كاپيتان اتاعى بولۋى مۇمكىن ەمەس. ال، ۇشىنشىدەن، رەسەي زاڭىنا سايكەس فەدەرالدىق قاۋىپسىزدىك كوميتەتىنىڭ بارلىق قىزمەتى مەملەكەت ىشىندە جۇرگىزىلەدى. وزگە ەلدەردە قىزمەت وتەيتىندەر باسقا ءبولىمنىڭ قىزمەتكەرلەرىنەن بولادى.

رەسەي ۇكىمەتىنىڭ وكىلى بۇل ءبىر جوعارى دەڭگەيدە ماقساتتى تۇردە جاسالعان قاۋەسەت ەكەنىن ايتتى. رەسەيدىڭ قورعانىس مينيسترلىگى تاراتقان مالىمدەمە بويىنشا رەسەي جانە سيريا ۇكىمەتىنىڭ بارلىق قىزمەتكەرلەرى قازىر وتە قاۋىپسىز. دەگەنمەن، وسىدان بۇرىن رەسەي ۇكىمەتى جاريالاعان مالىمەت بويىنشا، كرەمل 2015 جىلدىڭ قىركۇيەگىندە سۇرياداعى وپەراتسيانى باستاعاننان بەرى، 30 رەسەيلىك اسكەري قىزمەتكەر قاتا تاپقان.

“The Qazaq Times”