Resey mwnayı men tabiği gazınıñ Europağa jetkizilu tarmarqtarı. Foto: National Geographic Society

Batıs Resey mwnayın satıp aluğa tosqauıl qoyatın bolsa, Resey Europağa jetkizilip jatqan gazın da toqtatıp tastaytının mälimdedi. Osı jöninde aytqan Resey vice-prem'eri Aleksandr Novak: «Resey mwnayınan bas tartu jahandıq narıqqa küyretuşi apat alıp keledi», – degen.

Özderiñizge belgili bolğanday, Reseydiñ Ukrainağa basıp kiruine baylanıstı AQŞ özderiniñ serikterin orıs mwnayınan bas tartuğa şaqırıp jatqan bolatın. Alayda, jahandıq narıqta Resey mwnay men gazınıñ özindik orını bar. Qazirdiñ özinde Resey şiki mwnay boyınşa älemde ekinşi orındı, al tabiği gaz boyınşa älemde birinşi twrğan memleket.

Novaktıñ aytısınşa, Resey mwnayına şekteu qoyılğan jağdayda jahandıq energiya  narığında bağalar şarıqtap, qazirgiden eki esege deyin ösip ketui mümkin. Onıñ esebine sensek mwnaydıñ är barreli 300 AQŞ dollarına teñ boluı mümkin eken.

AQŞ-tıñ Resey mwnayınan bas tartu nemese tosqauıl qoyu josparı auqımdı bolğanımen, onıñ jüzege asuında birqatar naqtı kedergiler bar. Aytalıq, Europa odağı mwnaydıñ 40 payızın, gazdıñ 30 payızın Reseyden kirgizedi. Qısqa uaqıtta däl osınday kölemdegi mwnay men gazdıñ balama közderin tauıp alu Europa üşin tım qiın. Mülde balama közi joq degendi bildirmeydi, biraq Europa şartına, standartına say energiya közin tauıp onımen kelisimge kelip bolu birşama wzaq procesti qajet etedi.

Eger, Resey rasında özi aytqanday jauap qadamın jasaytın  bolsa, bwl Europadağı auır energiya dağdarısına alıp kelui de ğajap emes. Keşe,  7 naurız küni Germaniya men Gollandiya (Niderland) bwl josparğa qarsılığın bildirdi.

Jalpı, Reseydiñ mwnayı men gazına şekteu qoyu turalı Ukraina biligi de Europa men AQŞ-qa ötiniş etken. Al, Batıs elderi bağalardıñ aspandau ketuinen alañdap onday qadamğa batıldıq ete almay otır. Keşe mwnay bağası är barreline 139 dollarğa deyin jetip,  soñğı 14 jıldağı eñ joğarı körsetkişke jetti.

Qazirşe Europadağı iri elder Resey energiyasınan birtindep bas tartu mindetin aldı. Bwl anığında Resey mwnay-gazınıñ balaması tabılğanğa deyingi şaralar boluı da mümkin.

The Qazaq Times