BWW Bas assambleyasınıñ otırısında Reseyge qarsı basım dauıs berildi. Foto: Reyter

BWW Bas assambleyasınıñ särsenbidegi otırısında Reseydiñ Ukrainağa basıp kiruin basım köp müşe elderdiñ dauıs beruimen ayıptadı. Äri Halıqaralıq qauımdastıq Reseyden Ukraina jerindegi äskerdi tez arada jäne tolıq şığarıp ketudi talap etti.

Dauıs beruge 181 müşe el qatıstı (qauımdastıqqa müşe elderdiñ jalpı sanı 193), olardıñ 141-i Mäskeuge qarsı dauıs berse, 35 el qalıs qalıp, Reseydi qosa alğanda 5 memleket qarsı dauıs berdi. Reseydiñ äskerin şığaru turalı qaulığa qajetti üşten eki köpşilik dauıs qoldadı.

Wyımnıñ bas hatşısı Antoniu Guterriş jurnalisterge bergen pikirinde: «Bas Assambleyanıñ signalı qattı jäne anıq. Ukrainadağı soğıs qimıldarın qazir toqtatıñız, däl qazir artilleriyanı tınıştandırıñız. Dialog pen diplomatiyanıñ esigin qazir aşıñız, – dedi Reseyge qarata.

Bas Assambleyanıñ kezekti otırısında Europalıq odaqtıñ 27 müşe eli özge elderdiñ Reseyge qarsı dauıs beruine köbirek küş saldı. Sonday-aq, dauıs beru aldında AQŞ-tıñ BWW-dağı elşisi Tomas Grinfild söz söylep qauımdastıq müşelerine ündeu jasağan bolatın. Ol ündeuinde: «Eger Birikken Wlttar Wyımınıñ qanday da bir maqsatı bolsa, ol soğıstı boldırmau, soğıstı ayıptau jäne soğıstı toqtatu. Bwl bizdiñ bügingi mindetimiz», – degen edi.

Sonımen, BWW rezolyuciyası Reseydiñ 24 aqpanda Ukrainağa qarsı «arnayı äskeri operaciya» jariyalauın ayıptaydı jäne Mäskeudi BWW jarğısın bwzdı dep sanaydı.

Reseydiñ BWW-dağı twraqtı ökili Nebenzya renişti mälimdeme jasadı. Foto: VOA

Biraq, BWW qaulısı Reseydi rayınan qaytara almaytını bayqaldı. Reseydiñ Birikken Wlttar Wyımındağı twraqtı ökili Vasiliy Nebenziya dauıs beru aldında: «Bizdiñ arnayı operaciyamızdıñ maqsatı BWW Jarğısınıñ 51-babına säykes jariyalandı jäne maqsat orındaladı», - dedi.

BWW esebinşe Ukrainada soğıs bastalğalı beri elden 874 mıñ adam şetelge şığıp ketti. Boljamdarğa säykes elden 4-5 mln bosqın Europa elderine ötui mümkin.

The Qazaq Times