بۇۇ باس اسسامبلەياسىنىڭ وتىرىسىندا رەسەيگە قارسى باسىم داۋىس بەرىلدى. فوتو: رەيتەر

بۇۇ باس اسسامبلەياسىنىڭ سارسەنبىدەگى وتىرىسىندا رەسەيدىڭ ۋكرايناعا باسىپ كىرۋىن باسىم كوپ مۇشە ەلدەردىڭ داۋىس بەرۋىمەن ايىپتادى. ءارى حالىقارالىق قاۋىمداستىق رەسەيدەن ۋكراينا جەرىندەگى اسكەردى تەز ارادا جانە تولىق شىعارىپ كەتۋدى تالاپ ەتتى.

داۋىس بەرۋگە 181 مۇشە ەل قاتىستى (قاۋىمداستىققا مۇشە ەلدەردىڭ جالپى سانى 193), ولاردىڭ 141-ءى ماسكەۋگە قارسى داۋىس بەرسە، 35 ەل قالىس قالىپ، رەسەيدى قوسا العاندا 5 مەملەكەت قارسى داۋىس بەردى. رەسەيدىڭ اسكەرىن شىعارۋ تۋرالى قاۋلىعا قاجەتتى ۇشتەن ەكى كوپشىلىك داۋىس قولدادى.

ۇيىمنىڭ باس حاتشىسى انتونيۋ گۋتەرريش جۋرناليستەرگە بەرگەن پىكىرىندە: «باس اسسامبلەيانىڭ سيگنالى قاتتى جانە انىق. ۋكرايناداعى سوعىس قيمىلدارىن قازىر توقتاتىڭىز، ءدال قازىر ارتيللەريانى تىنىشتاندىرىڭىز. ديالوگ پەن ديپلوماتيانىڭ ەسىگىن قازىر اشىڭىز، – دەدى رەسەيگە قاراتا.

باس اسسامبلەيانىڭ كەزەكتى وتىرىسىندا ەۋروپالىق وداقتىڭ 27 مۇشە ەلى وزگە ەلدەردىڭ رەسەيگە قارسى داۋىس بەرۋىنە كوبىرەك كۇش سالدى. سونداي-اق، داۋىس بەرۋ الدىندا اقش-تىڭ بۇۇ-داعى ەلشىسى توماس گرينفيلد ءسوز سويلەپ قاۋىمداستىق مۇشەلەرىنە ۇندەۋ جاساعان بولاتىن. ول ۇندەۋىندە: «ەگەر بىرىككەن ۇلتتار ۇيىمىنىڭ قانداي دا ءبىر ماقساتى بولسا، ول سوعىستى بولدىرماۋ، سوعىستى ايىپتاۋ جانە سوعىستى توقتاتۋ. بۇل ءبىزدىڭ بۇگىنگى مىندەتىمىز»، – دەگەن ەدى.

سونىمەن، بۇۇ رەزوليۋتسياسى رەسەيدىڭ 24 اقپاندا ۋكرايناعا قارسى «ارنايى اسكەري وپەراتسيا» جاريالاۋىن ايىپتايدى جانە ماسكەۋدى بۇۇ جارعىسىن بۇزدى دەپ سانايدى.

رەسەيدىڭ بۇۇ-داعى تۇراقتى وكىلى نەبەنزيا رەنىشتى مالىمدەمە جاسادى. فوتو: VOA

بىراق، بۇۇ قاۋلىسى رەسەيدى رايىنان قايتارا المايتىنى بايقالدى. رەسەيدىڭ بىرىككەن ۇلتتار ۇيىمىنداعى تۇراقتى وكىلى ۆاسيلي نەبەنزيا داۋىس بەرۋ الدىندا: «ءبىزدىڭ ارنايى وپەراتسيامىزدىڭ ماقساتى بۇۇ جارعىسىنىڭ 51-بابىنا سايكەس جاريالاندى جانە ماقسات ورىندالادى»، - دەدى.

بۇۇ ەسەبىنشە ۋكراينادا سوعىس باستالعالى بەرى ەلدەن 874 مىڭ ادام شەتەلگە شىعىپ كەتتى. بولجامدارعا سايكەس ەلدەن 4-5 ملن بوسقىن ەۋروپا ەلدەرىنە ءوتۋى مۇمكىن.

The Qazaq Times