Sot bes jılğa jaza kesken Öjet Jeñishan men äkesi Jeñishan Äkiräm. Foto: kznews.kz

Prezidentten tartıp, memlekettik hatşığa deyin «Qañtar oqiğasına» qatıstı tergeu, sot isteriniñ ädil bolatının uäde etken edi. Alayda, külli el azamattarı köz tigip otırğan atalmış oqiğağa qatıstı alğaşqı sot ükiminiñ özi küdikti äri talastı pikirlerge tolı boldı.

El tarihındağı eleuli oqiğağa qatıstı alğaşqı sot ükiminde Öjet Jeñishan men Baqıt Oñtay qatarlı Almatı oblısı Esik qalasınıñ twrğındarına Almalı audandıq sotı Qılmıstıq kodekstiñ 291 babı 3 böligi boyınşa («Qarulı, oq-dirilerdi, jarılğış zattar men jarılıs qwrılğıların jımqıru ne qorqıtıp alu») ayıp tağıp 5 jıl jaza kesken.

"Qaru-jaraq wrlau" babımen sottalğan Baqıt Oñtay jäne Öjet Jeñishan. Foto: Azattyq.org

Sottaluşılardıñ jaqındarı sot ükimimen kelispeytinin, balalarınıñ terorrist emes ekenin aytıp, prezident Toqaevtıñ iske aralasuın swrap otır. Aytalıq, Ojet Jeñishannıñ äkesi Jeñishan Äkrämwlı prezidenttiñ atına joldağan video ündeuinde: «Meniñ wlım terrorist emes. Eşqanday qılmıstıq wyımğa qatısı joq. Alañğa öziniñ talabın aytu üşin şıqtı. Beybit şeruge qatıstı. Sol kezde äldekimder qaru kezep, qorqıtıp, qolına qaru wstatıp jibergen. Ol qarudan oq atılmağan. Qwrmetti prezident, sizden wlımızğa araşa tüsudi tüsudi swraymız. Jaña Qazaqstandağı sot jüyesi ädil şeşim şığararın aytıp ediñiz, bizdiñ balamızğa ädiletsiz ükim şığarıp otır”, – deydi.

Ayıptalğan azamattardıñ jaqındarı olar wstalıp ketkennen sot ükimi şıqqanğa deyin jaqındarımen kezdestirmegenin aytadı. Al, memleket jağınan tağayındalğan advokat Qwralay Qaliasqarov ayıptaluşılardıñ ayıptı moyındağanın mälemdegen.

Jası jiırmadan endi ğana asqan, tepse temir üzetin eki jigittiñ isine qatıstı sot şeşimi eleuli oqiğağa qatıstı alğaşqı sot ükimi ekenin eskersek, beybit narazılıq bildirgeni üşin nemese kezdeysoq alañda bolıp qalğanı üşin tergeu abaqtılarına tüsken, policiyadan qiındau, azaptau körgen azamattardıñ isine qatıstı sot ükimderiniñ şınayılığı men ädildigi turalı küdikke jol aşadı.

Qazirgi tañda, «Qañtar oqiğası» kezinde alañğa beybit türde barıp öziniñ azamattıq pikirin jetkizbek bolğan talaylağan azamattıñ isti bolıp, tipti tergeu abaqtılarında azaptauğa wşırap jatqanı belgili. Tergeu abaqtılarında azaptau faktleriniñ bolğanın memleket tarabı da moyındağan. Eñ qiını azaptau arqılı qılmıstıq jauapkerşilikti moyınına jüktep jatqandarı da boluı äbden mümkin. Bwl prezident Toqaev aytqan «Jaña Qazaqstannıñ» sot jüyesine degen halıq senimine de qatıstı is bolıp otır.

The Qazaq Times