Ryabkov pen Şerman Jenevada kezdesti. Foto: BBC

Keşe, 10 qañtar küni AQŞ pen Resey qauipsizdik jönindegi alğaşqı kelissözderin Jeneva qalasında ötkizdi. Bügin NATO men Resey arasındağı kelissöz Bryussel'de, erteñ EIQW men Resey kelissözine jalğasadı.

AQŞ-Resey arasındağı söylesu jabıq küyde ötti. Kezdesudegi negizgi talqı taqırıbı Resey taraptan: NATO-nıñ şığısqa keñeyuin toqtatu; AQŞ taraptan: Ukraina şekarasındağı Resey äskerleri. Resey delegaciyasın SİM basşısınıñ orınbasarı Sergey Ryabkov pen qorğanıs ministriniñ orınbasarı Aleksandr Fomin basağan; al, AQŞ delegaciyasın Blinkenniñ orınbasarı Uendi Şerman men qaru-jaraqtı baqılau boyınşa keñesşisi Bonni Jenkins basqardı.

Kezdesuden keyin taraptar baysaldı beynede mälimdemeler jasadı.

Mälimdemesinde Ryabkov: «Ukraina NATO-nıñ müşesi bolmaytınına bizdiñ közimiz jetui kerek, bwnı biz basa belgileymiz», – degen. Ol Resey delegaciyasınıñ talabı 2008 jılı Buhareste qabıl alınğan joba qayta qaralıp, «Ukraina men Gruziya eşqaşan Soltüstik Atlantikalıq Alyanstıñ müşesi bola almaydı» degen mätinniñ qosıluı dep körsetti. Resey tarabı bwnıñ zañdıq twrğıda bekitiluin qalaydı.

Al, Ukrainanı basıp alu mäselesi boyınşa Ryabkovtıñ sözi qısqa boldı: «Biz Ukrainağa basıp kirgeli jatqan joqpız, sondıqtan bwl turalı söylesudiñ de qajeti joq», – dedi.

Uendi Şerman bolsa: «Biz ekinşi bir memleketke NATO esigin jauıp qoyuğa eşqaşan jol bermeymiz», – degen.

Al, «Ukrainağa şabuıl jasağalı jatqan joqpız» degen sözge qarata: «Olardıñ basıp kirmeytini jağdaydı oñap, äskeri kazarmaların alıp ketkende ğana belgili boladı», – dep qayırdı.

Taraptar jabıq kelissözde qanday kelisimge jetiskeni turalı mälimet joq. Alda, türli aqparat közderi ielegen habarları jarıqqa şığar. Degenmen, Reseydiñ delegaciyası Bryussel' men Venada NATO jäne EIQW-men kelissözinen keyin ğana jalpı nätijeniñ kartinasın köre alatındaymız.

The Qazaq Times