ريابكوۆ پەن شەرمان جەنەۆادا كەزدەستى. فوتو: BBC

كەشە، 10 قاڭتار كۇنى اقش پەن رەسەي قاۋىپسىزدىك جونىندەگى العاشقى كەلىسسوزدەرىن جەنەۆا قالاسىندا وتكىزدى. بۇگىن ناتو مەن رەسەي اراسىنداعى كەلىسسوز بريۋسسەلدە، ەرتەڭ ەىقۇ مەن رەسەي كەلىسسوزىنە جالعاسادى.

اقش-رەسەي اراسىنداعى سويلەسۋ جابىق كۇيدە ءوتتى. كەزدەسۋدەگى نەگىزگى تالقى تاقىرىبى رەسەي تاراپتان: ناتو-نىڭ شىعىسقا كەڭەيۋىن توقتاتۋ; اقش تاراپتان: ۋكراينا شەكاراسىنداعى رەسەي اسكەرلەرى. رەسەي دەلەگاتسياسىن ءسىم باسشىسىنىڭ ورىنباسارى سەرگەي ريابكوۆ پەن قورعانىس ءمينيسترىنىڭ ورىنباسارى الەكساندر فومين باساعان; ال، اقش دەلەگاتسياسىن بلينكەننىڭ ورىنباسارى ۋەندي شەرمان مەن قارۋ-جاراقتى باقىلاۋ بويىنشا كەڭەسشىسى بونني جەنكينس باسقاردى.

كەزدەسۋدەن كەيىن تاراپتار بايسالدى بەينەدە مالىمدەمەلەر جاسادى.

مالىمدەمەسىندە ريابكوۆ: «ۋكراينا ناتو-نىڭ مۇشەسى بولمايتىنىنا ءبىزدىڭ كوزىمىز جەتۋى كەرەك، بۇنى ءبىز باسا بەلگىلەيمىز»، – دەگەن. ول رەسەي دەلەگاتسياسىنىڭ تالابى 2008 جىلى بۋحارەستە قابىل الىنعان جوبا قايتا قارالىپ، «ۋكراينا مەن گرۋزيا ەشقاشان سولتۇستىك اتلانتيكالىق اليانستىڭ مۇشەسى بولا المايدى» دەگەن ءماتىننىڭ قوسىلۋى دەپ كورسەتتى. رەسەي تارابى بۇنىڭ زاڭدىق تۇرعىدا بەكىتىلۋىن قالايدى.

ال، ۋكراينانى باسىپ الۋ ماسەلەسى بويىنشا ريابكوۆتىڭ ءسوزى قىسقا بولدى: «ءبىز ۋكرايناعا باسىپ كىرگەلى جاتقان جوقپىز، سوندىقتان بۇل تۋرالى سويلەسۋدىڭ دە قاجەتى جوق»، – دەدى.

ۋەندي شەرمان بولسا: «ءبىز ەكىنشى ءبىر مەملەكەتكە ناتو ەسىگىن جاۋىپ قويۋعا ەشقاشان جول بەرمەيمىز»، – دەگەن.

ال، «ۋكرايناعا شابۋىل جاساعالى جاتقان جوقپىز» دەگەن سوزگە قاراتا: «ولاردىڭ باسىپ كىرمەيتىنى جاعدايدى وڭاپ، اسكەري كازارمالارىن الىپ كەتكەندە عانا بەلگىلى بولادى»، – دەپ قايىردى.

تاراپتار جابىق كەلىسسوزدە قانداي كەلىسىمگە جەتىسكەنى تۋرالى مالىمەت جوق. الدا، ءتۇرلى اقپارات كوزدەرى يەلەگەن حابارلارى جارىققا شىعار. دەگەنمەن، رەسەيدىڭ دەلەگاتسياسى بريۋسسەل مەن ۆەنادا ناتو جانە ەىقۇ-مەن كەلىسسوزىنەن كەيىن عانا جالپى ناتيجەنىڭ كارتيناسىن كورە الاتىندايمىز.

The Qazaq Times