Aqmola oblısınıñ auıldarında TJ jariyalanuı mümkin

25 şilde küni Aqmola oblısında düley dauıl jaypap ötken eki auılda «tötenşe jağday» rejimi engizilmek.

Jeksenbi keşkisin Izobil'noe jäne Bestöbe auıldarında köterilgen dauıldan 5-10 minuttıñ işinde 17 elektr bağanı tübinen qwlap, ondağan üydiñ şatırı bülinip-wşıp ketken. Jelekti alqapqa jatatın ağaştardı tamırımen qoparıp ketken. 30-dan asa üydiñ astañ-kesteñi şıqqan. Birqatar äkimşilik ğimarattar da aytarlıqtay bülingen. Negizgi transformator da qwlağandıqtan, 150-ge tarta nısan jarıqsız qalğan. Qazirgi uaqıtta jedel ştab qwrılıp, elektr jelilerin qalpına keltiru jwmısı jürip jatır.

Aqmola oblısı TJD baspasöz qızmeti taratqan aqparatqa qarağanda, jel 25-30 m/s jıldamdıqta twrğan. Kelgen zalaldıñ şığının esepteu maqsatında komissiya qwrılğan. Jergilikti şeneunikter zardap şekken barlıq twrğınğa kömektesuge dayın ekenin bildirip, ötemaqı retinde 100 mıñ teñgeden töleuge uäde etken.

«Bwl tölemge ötinim beru merzimi üş ay. Qwjattardı uaqtılı qayta räsimdep ülgermegen halıqtıñ osı aralıqta mümkindigi bar. Meniñ oyımşa, eki künd TJ basqarmasımen jwmıstanıp, äleumettik qorğau bağıtında tamız ayınıñ alğaşqı küni zardap şekken twrğındarğa aqşa audaruğa tırısamız»,– dep tüsindirdi Stepnogorsk qalasınıñ äkimi Erkebwlan Bayahmetov.

Aqmola oblısı Tötenşe jağdaylar departamenti bastığınıñ orınbasarı Qanat Dospaevtıñ aytuınşa, eşkim nazardan tıs qalmaydı, alda Stepnogorsk qalası äkimdigi komissiya otırısın ötkizedi.

Düley jelden bülingen transformator. Aqmola oblısı, Izobil'noe auılı. Foto: Aqmola oblıstıq TJD baspasöz qızmeti

“The Qazaq Times”