Büginge deyin älem boyınşa 193 million adam koronavirus jwqtırğan. Osığan baylanıstı jer-jerde karantin qatañdatılıp, vakcinaciyalau qarqını arttı. Bwğan narazı Europa halqı mitingke şıqsa, Braziliyada şeruşiler «pandemiyağa tötep bere almağan» ükimettiñ otstavkasın talap etti.

Qazir ölim-jitim körsetkişi men nauqas sanı boyınşa AQŞ, Latın Amerikası elderi jäne Resey antirekord tiziminde. Amerikada koronaviruspen auırğandardıñ sanı täuligine 45 mıñnan asqan Bwl ötken aptamen salıstırğanda 65%-ğa joğarı körsetkiş. Auruhanağa tüskenderdiñ sanı da artqan. Al vakcinalau qarqını qañtardan bergi eñ tömengi körsetkişke jetti.

Australiya biligi Sidney qalası men oğan qarastı okrugtegi indettiñ örşuin «wlttıq deñgeydegi tötenşe jağday» dep mälimdedi. Jaña Otüstik Uel's ştatınıñ Prem'eri jwqpalı dertpen küresu üşin Sidneyge şwğıl türde vakcina jetkizudi swradı. Resmi mälimetke qarağanda, mwnda soñğı bir täulikte 140 adam virus jwqtırğan. Sol sebepti Sidneyde twrğındardıñ jürip twruına şekteu engizilgen.

Koronavirustıñ dominanttı del'ta ştamı qazir Europanıñ barlıq derlik elinde tirkelgen. Düniejüzilik densaulıq saqtau wyımınıñ ökilderi aldağı uaqıtta ol älemdegi basım ştamğa aynalatının aytadı. Qauipti ştammen qatar, Wlıbritaniyada virustıñ tağı bir jaña türi anıqtaldı. Mutaciyağa äli atau berilmegen. Negizi onı jwqtırudıñ älemdegi eñ alğaşqı deregi biıl qañtarda Kolumbiyada tirkelgen. Osı künge deyin ol 26 elde rastaldı. Britandıq mamandar virustıñ bwl türi indettiñ auır formada ötetinin, ne vakcinanıñ tiimdiligin tömendetenin rastaytın aqparat joq deydi.

Oñtüstik Koreyadağı ahual da mäz emes. Büginnen bastap Seul men oğan qarastı audandarda koronavirusqa qarsı şekteu şaraları tağı jartı ayğa wzartıldı. Soñğı bir künde bwl aymaqta 2 mıñ adam koronavirus jwqtırğan. Bwl şildeniñ bas kezindegi körsetkişten eki ese artıq. Mamandar nauqastar sanınıñ kürt artuın «del'ta» ştamımen baylanıstırıp otır.

Braziliyanıñ San-Paulu qalasında prezidenttiñ otstavkasın talap etken jwrt ereuil wyımdastırdı. Narazılıq akciyasınıñ soñı policeylermen qaqtığısqa wlasqan.   Pandemiya kezinde Braziliya prezidentiniñ halıq arasındağı bedeli kürt tömendegen. Öytkeni onıñ koronaviruspen küres şaraları köbiniñ köñilinen şıqpay otır. Aytularınşa, memleket basşısınıñ özi bıltır indetpen auırsa da, äli künge deyin onıñ qaupin jete bağalamaydı.

Al Latın Amerikasındağı bwl elde virusqa baylanıstı kisi ölimi jartı millionnan asıp ketti. Onıñ üstine halıq vakcinalau nauqanınıñ bayau jürip jatqanın aytadı. Qazirge deyin ekpeniñ eki dozasın halıqtıñ 17%-ı alğan.

Negizi kelesi jılı Braziliyada prezidenttik saylau ötui tiis. Oğan qazirgi memleket basşısımen qatar eks-prezident Luis de Silva da qatısuı mümkin. Biraq äleumettik saUalnama nätijeleri halıqtıñ köbi qazirgi memleket basşısına emes, de Silvağa dauıs beruge dayın ekenin körsetken.

"The Qazaq Times"