Kollaj memlekettik satıp alular portalı men aşıq derekközderden alınğan fotolardan jasaldı.

Jemqorlıq dauınan keyin äkimi isti bolğan Bayanauıl audanında milliard teñgege memorialdıq keşen salınbaqşı. Memlekettik satıp alular portalında Bayanauıl audanı ekonomikasınıñ naqtı sektorı bölimi jaryalağan tenderdiñ qorıtındısı jariyalandı.

Memlekettik satıp alular portalına Bayanauıl audanı ekonomikasınıñ naqtı sektorı bölimi mamırdıñ 24-i küni Oljabay men Jasıbay batırlarğa arnalğan memorialdıq keşen saluğa baylanıstı tender jariyalağan. Tenderge qwjattardı qabıldau mausımnıñ 8-i küni ayaqtalğan. Biraq osı uaqıtqa deyin portalğa tenderdiñ soñğı qorıtındısı turalı aqparat ilinbegen. Jariyalanğan mälimet boyınşa, konkursqa «Verşina» JŞS, «GIDROPROM» JŞS, «Astana-Köktem S» JŞS, «KazEvroStroy» JŞS, «Korporaciya AQ ordası» JŞS jäne «AST Tehnologiya» JŞS kompaniyaları qatısqan. Atalğan altı kompaniyanıñ işinen tenderdi ekibastwzdıq «Verşina» JŞS kompaniyası jeñip alğan. Tenderdiñ qorıtındısına baylanıstı «Astana-Köktem S» jäne «Korporaciya AQ orda» JŞS şağım tüsirgen. Biraq olardıñ şağımın Qarjı ministrliginiñ işki audit komitetiniñ Pavlodar oblısı boyınşa işki memlekettik audit departamenti qanağattandırmağan.

«Verşina» JŞS memlekettik satıp alular portalına 2016 jıldıñ qañtar ayında tirkelgen. Uchet.kz servisindegi derekterge qarağanda, kompaniyanı Ismailov Jandarbek Audanbaywlı basqaradı. Käsiporın 2009 jıldan beri qwrlısı salasında jwmıs isteydi. 2010-2021 jıldar aralığında 1 661 326 869 teñge salıq tölegen. Ismailov Jandarbek Audanbaywlınıñ atında bwdan bölek «Al'-Maktub», «Olesan» jäne «Pavlodar antiseptik zautı» JŞS kompaniyaları bar.

Portalda iligen habarlandıruda eskertkiş ornatuğa bölinetin josparlanğan somma 793 717 460 teñge delingen. Biraq lottıñ tehnikalıq erekşelikteri böliminde jwmıstıñ smetalıq qwnı 949 733 767 million teñge dep körsetilgen. Lottıñ kelisimşarttar böliminde eşqanday qwjat jariyalanbağan.

Bwğan deyin Oljabay men Jasıbay batırlarğa milliard teñgege memorialdı keşen saluğa Bayanauıl halqı qarsı şıqqan. Olar bwl qarjığa su men käriz qwbırın jöndegen tiimdi ekendigin aytqan.

Bayanauıl audanınıñ twrğını Oral Sartaev bir milliardqa juıq qarjını eskertkişke jwmsağanşa, oğan audandağı äleumettik mäselelerdi şeşken dwrıs dep esepteydi. Ol osınday mäselelerdiñ biri retinde Bayanauıldıñ käriz qwbırın aytadı.

«Qazir Bayanauılğa birinşi kezekte käriz jüyesi qajet. Bizdiñ jer topıraqtı emes, tastı bolıp keledi. Sol sebepti käriz su kölge barıp jatır. Biz bwnı ekologiyalıq zertteu kezinde däleldegenbiz. Eger bwl jalğasa beretin bolsa, onda 15-20 jılda kölge tüsu mümkin bolmaydı», - deydi Sartaev.

Bwğan deyin audan äkimi Qanat Kärimov BAQ ökilderine memorialdıq keşenge bölingen qarjı anau aytqanday qımbat emes ekendigin jäne bölingen qarjınıñ jartısına juığı demeuşilerdiñ aqşası ekendigin aytqan.

«Jobanıñ jalpı qwnı 934 million teñge. 600-ge juıq ağaş otırğızu kerek. Bwdan bölek, 2,5 mıñ şarşımetr gül aumağı men tratuar bar. 100-ge juıq jarıqtandıru qwrılğısı, balalar men jasöspirimderge arnalğan alañ jäne eki eskertkiş boladı. Sol sebepti «bwl öte qımbat» deytinderdiñ pikirimen kelise almaymın», - degen Kärimov.

Foto memlekettik satıp alular portalınan alındı.

Jalpı, Qazaqstanda eskertkiş, memorialdıq keşen saluğa kelgende şendiler «qarjını demeuşiler berdi» degen uäjdi jii aytadı. Jaqında Astana küni qarsañında Türkistan men elordada eks-prezident Nwrswltan Nazarbaevqa eskertkiş aşılğanda da atqaminerler däl osı «demeuşiler qarjısı» jöninde aytqan.

Pavlodar oblısı Bayanauıl audanınıñ şeneunikteri milliardtarğa eskertkiş qoyumen ğana emes, äuejay men su qwbırı qarjısın jımqırumen de jalpaq jwrtqa tanımal. 2021 jıldıñ qañtar ayında Bayanauıl audanınıñ eks-äkimi Orazgeldi Qayırgeldinov wşıp-qonuğa jaramsız äuejay satıp alğanı üşin 3,5 jılğa sottalğan. Audannıñ qazirgi äkimi Qanat Kärimovtiñ sözinşe, äuejay ülken wşaqtar men turisterdi qabıldau üşin janındağı taudı bwzu qajet.

Bwdan bölek, bıltır jeltoqsanda QR Qarjı ministrliginiñ qarjı monitoringi komitetiniñ telegram arnasında däl osı Bayanauıl audanına qatıstı aqparat jariyalanğan. Onda 2017-2019 jıldarı Bayanauıl su qwbırlarınıñ qwrılısına bölingen 1,2 milliard teñge byudjet qarjısınıñ jımqırılğanı jöninde aytılğan. Sol uaqıttan beri atalmış oqiğa boyınşa sotqa deyingi tergeu jwmıstarı jürip jatır. Äzirge onıñ nemen ayaqtalatını belgisiz.

Bwl kontent AQŞ damu agenttigi (USAID) arqılı amerika halqınıñ kömegimen "MediaCAMP – Ortalıq Aziya bağdarlaması" ayasında dayındaldı. The Qazaq Times portalı aqparattıñ mazmwnına tikeley jauaptı jəne aqparat USAID-tıñ nemese AQŞ ükimetiniñ, sonımen qatar Internews wstanımına say kelmeui mümkin.

"The Qazaq Times"