Almatı qalasındağı I.S.Jekenova atındağı qalalıq jwqpalı aurular klinikalıq auruhanasınıñ reanimaciya böliminde kezekşilikte otırğan medqızmetker. Foto: aşıq derekköz

Almatı qalasında aptanıñ alğaşqı küni tirkelgen koronavirus jwqqandar sanı rekordtıq deñgeyge jetti. Bir täulikte – 545 nauqas. 468-i simptomdıq belgileri bar jäne 77-si simptomsız.

«Jwqpalı aurularğa arnalan stacionarlarda 5 mıñ tösek-orın bar. Onda 2696 adam, onıñ işinde 108 bala emdelip jatır. 29 naurızdağı derek boyınşa, barlıq sırqattıñ arasındağı 32 adamnıñ häli öte auır, al 302 pacienttiñ jağdayı auır küyde. Orta därejede 2362 sırqat tösekke tañulı. Bwdan basqa 3,2 mıñnan astam adam ambulatorlıq deñgeyde, yağni üy jağdayında emdelip jatır», – dedi qalalıq qoğamdıq densaulıq basqarmasınıñ basşısı Nariman Tabınbaev bügingi brifingte.

Onıñ mälimetinşe, jalpı reanimaciya jäne intensivti terapiya böliminde 135 adam emdelude, tağı 285 bos orın dayındalğan. Sonday-aq 8 nauqas ökpeni jasandı jeldetu qwrılğısına qosılsa, odan özge 55 adam invazivti emes ÖJJ jäne 42 adam High flow apparatımen tınıstap jatır.

Düysenbi küni 262 adam auruhanağa jatqızıldı jäne 317 adam üyine jiberilgen.

«Qala boyınşa jinalğan taldau sınamaları eki zerthanada zertteldi. Nätijesinde britandıq jäne oñtüstikafrikalıq ştamdar anıqtaldı. Bwlar ädettegiden eki esege jıldam jwğadı. Osı sebepti karantin şaraları küşeytildi. Ötken aptada 100 mıñğa twrğınğa şaqqanda 149 sırqat tirkeldi, reproduktivti körsetkiş 1,114 boldı. Megapolis köleminde 3082 indet oşağı bar», – dep mälimdedi bas sanitar däriger Jandarbek Bekşin.

Bekşin bıltırğı «ekinşi jartıjıldıqta 281 oquşı auırğan edi. Al biılğı üş ayda 1468 bala nauqastandı. Sondıqtan barlıq mektepti onlayn formatqa auıstıruğa tura keldi. Tek kezekşi sınıptarğa rwqsat etildi» dedi.

Pandemiya bastalğalı KVI+ (infekciya PTR testi arqılı rastalğan) boyınşa 35,5 mıñnan asa adam koronavirus jwqtırğan. Ondağı 22 656 adamda simptomdıq belgiler anıqtalğan, al 11 mıñğa tarta nauqas simptomsız türine şaldıqqan. Büginge deyin 27 mıñğa juıq adam emdelip şıqqan. Sonımen qosa, 452 adam qaytıs bolğan.

Bıltırğı 1 tamızdan beri 5519 adamğa KVI- (koronavirus pnevmoniyası) diagnozı qoyılğan.

Naurız ayında äzirge Almatı qalasında 8,5 mıñnan asa nauqas tirkelip ülgerdi. Qalada naurız ayınıñ alğaşqı dekadasında täuligine jüzden kem emes jağday tirkeldi, 10-ınan beri bwl san eselenip ösude. Osığan deyin bas sanitar Bekşin bir künde auruhanağa 500-den asa nauqas tüser bolsa, tolıq lokdaun engiziletinin eskertken. 21 naurızdan bastap qatañdatılğan karantin rejimi 12 säuirge deyin wzartıldı.

Qalada tirkelgen 39 mıñnan asa nauqastıñ 22%-ı nemese 8561-i tek naurız ayına tiesili. Elde osı aydağı 31 mıñ sırqattıñ 27,5%-ı bir ğana Almatı qalasında anıqtalğan.

"The Qazaq Times"