Beynekamera. Körneki suret. Foto: video.gusarov-group.by

Düysenbiden seysenbige, 2 naurızğa qarağan tüni Şımkentte oqiğa ornına barğan jurnalisti policiyanıñ soqqığa jıqqanı turalı habarlandı. Policiya qaladağı küre joldardıñ biri Temirlan tas jolınıñ boyında ornalasqan avtokölik bölşekteri satılatın bazardan şıqqan örtten habar taratuğa barğan «Astana» telearnasınıñ tilşisi Bahrombek Talibjanovqa küş qoldandı.

Olar tilşige oqiğa ornında reportaj tüsiruge tıyım salğan. Üş policey Bahrambek Talibjanovtı «baylağan jäne beti men sol jaq büyreginen wrıp, süyregen». Sol sätte Bahrambektiñ äriptesi – 31 arnanıñ tilşisi Bahrom Abdullaev jağdaydı telefonına taspalap alğan.

Osıdan keyin tärtip saqşıları eki tilşini Abay audandıq policiya basqarmasına aparğan. «Astana» telearnasınıñ tilşisi küş qoldanğan policeylerdiñ üstinen arız jazğan. Policiya habarına qarağanda, qızmettik tekseris bastalğan. Degenmen äzirge qılmıstıq is qozğalmağan.

«Ädil söz» baspasöz qorğau wyımınıñ zañgeri Ğaliya Äjenovanıñ aytuınşa, tilşi Qılmıstıq kodekstiñ 158-babı («Jurnalistiñ käsibi qızetine kedergi jasau») jäne Äkimşilik kodekstiñ 73-1-babı («Densaulıqqa qasaqana jeñil ziyan keltiru») boyınşa arızdana aladı.

«Halıq ünine qwlaq asatın memleketke» aynaludı maqsat twtqan Qazaqstanda aqparat qwraldarınıñ qızmetine jii kedergi keltirilip, auıq-auıq qısım körsetiledi. Pandemiya kezinde därigerlermen tildespek bolğan, beybit jiındardan aqparat taratıp jürgen nemese saylau nauqanında, tipti tikeley efirde ötetin OKQ, OSK baspasöz brifingterde tilşilerge  türli kedergi jasaladı. Qazaqstan düniejüzindegi söz bostandığı reytinginde 180 eldiñ işinde 157-orında twradı.

Redakciya Ükimet pen onıñ qwramındağı qwzırlı organdardan atalğan jağdaydı jiti qaraudı jäne ädil de şınayı şeşim şığaruın swraydı. «Törtinşi bilik» ökilderine ğana qatıstı emes, kez kelgen «adam balasınıñ» haqı ayaqastı etiluine qarsılığımızdı, Konstituciyanıñ alğaşqı babında körsetilgendey, «Qazaqstan Respublikası özin demokratiyalıq, zayırlı, qwqıqtıq jäne äleumettik memleket retinde ornıqtıradı, onıñ eñ qımbat qazınası – adam jäne adamnıñ ömiri, qwqıqtarı men bostandıqtarı» ekenin eske salamız.

"The Qazaq Times"