Foto: QT

Almatıda Aşısay auılında kisi qolınan qaytıs bolğan Nwrlan Ahmetovtıñ isine baylanıstı baspasöz mäslihatı ötti.

Jiınğa publicist Marat Toqaşbaev, qoğam qayratkeri Irısbek Särsenbaywlı, belsendiler Sağidolla Mergenbaev pen Qıdıräli Oraz jäne  advokattar Janar Balğabaeva men Ğalım Nwrpeyisov qatıstı.

Irısbek Särsenbaywlı Nwrlan Ahmetovtıñ qazasın 2007 jılı bolğan qazaq-şeşen qaqtığısımen baylanıstıradı jäne bolğan oqiğanı terrorlıq qılıs dep esepteydi.

«Aşısayda Nwrlan Ahmetov bauırımızğa jasalğan qastandıqtı eşqanday aqılğa sıymaytın qılmıs dep bağalauımız kerek. Onı üyiniñ qasında toğız jerden pışaqtap, azaptap öltirgen. Bwğan qatardağı jay qılmıs  nemese wltaralıq qaqtığıs dep qarauğa bolmaydı. Degenmen bwl iste qazaq-şeşen qaqtığısına baylanıstı sözder aytıladı. Biraq bwnı tek osı eki wltqa tirep qoyuğa kelmeydi. Osınıñ basın aşıp alayıq. Men öz basım bwnı terrorlıq qılmıs dep esepteymin... Bwnıñ barlığı 2007 jılğı oqiğadan bastaladı. Bwnı şeşen diasporasınıñ ökili Mahmahanovtar äuleti jasağan äreket emes pe? degen küdik bar», - deydi Särsenbaywlı.

Irısbek Särsenbaywlı Nwrlan Ahmtovtıñ öliminen bölek, 2007 jılı bolğan qazaq-şeşen oqiğasın tağı birneşe qılmıspen baylanıstıradı.

«2002 jılı Almatı qalasında Nwrlan Twrısovtı äyelimen birge üyinde atıp ketti. Sol jerde tabılğan TT pistoletiniñ gil'zası Kazatkomda tabılğan oqpen säykes kelip otır. Demek, onıñ bwl qılmısqa qatısı bar ma? Bar. Tağı bir qılmıstıñ jurnalist Oralğayşamen qatısı bar. Ol kisi Qazaqmıspen baylanısı bar isti zerttep Almatığa kelgen. Öytkeni Mahmahanovtardıñ bireui sol jaqta (Qarağandıda-red)  adam öltiruge qatısı bar dep wstalğan. Biraq ile-şala osı jaqqa üy qamaqqa jiberilgen. Jurnalist osığan baylanıstı maqala jazdı. Keyinnen joğalıp ketti. Artında bir qızı qaldı. Tağdırı äli künge deyin belgisiz. Tiri bolsa bir jerden şığar edi. Onı da öltirip ketui äbden mümkin. Mına qılmıstı qarau kezinde osı oqiğalarğa nazar audarıluı kerek dep qoğamdıq komissiya müşeleri talap qoyıp otırmız...», - deydi Särsenbaywlı.

Baspasöz mäslihatı barısında komissiya müşeleri Nwrlan Ahmetovtıñ ölimine baylanıstı qozğalğan qılmıstıq istiñ qalay jürip jatqanın bilmeytinderin, äli künge deyin qwzırlı organdar tarapınan eşqanday jauap almağandarın ayttı. Jiın soñında belsendiler atalmış iske baylanıstı prezident Qasım-Jomart Toqaev pen şeşen diasporasınıñ ökilderine aşıq hat joldaytındarın mälimdedi.

Tamızdıñ 14-i küni Aşısay auılında jergilikti twrğın Nwrlan Ahmetov kisi qolınan köz jwmğan. Onı toğız jerden pışaqtap ketken. Tuıstarı Nwrlannıñ ölimin 2007 jılı Bäydibek bi auılında bolğan qazaq-şeşen qaqtığısımen baylanıstırğan. Ahmetovqa bwğan deyin de birneşe ret qastandıq jasalğan.

"The Qazaq Times"