قازاق-شەشەن قاقتىعىسىنىڭ جاڭعىرىعى: احمەتوۆ قازاسىنىڭ ارتىندا كىم تۇر؟

الماتىدا اششىساي اۋىلىندا كىسى قولىنان قايتىس بولعان نۇرلان احمەتوۆتىڭ ىسىنە بايلانىستى ءباسپاسوز ءماسليحاتى ءوتتى.

جيىنعا پۋبليتسيست مارات توقاشباەۆ، قوعام قايراتكەرى ىرىسبەك سارسەنبايۇلى، بەلسەندىلەر ساعيدوللا مەرگەنباەۆ پەن قىدىرالى وراز جانە  ادۆوكاتتار جانار بالعاباەۆا مەن عالىم نۇرپەيىسوۆ قاتىستى.

ىرىسبەك سارسەنبايۇلى نۇرلان احمەتوۆتىڭ قازاسىن 2007 جىلى بولعان قازاق-شەشەن قاقتىعىسىمەن بايلانىستىرادى جانە بولعان وقيعانى تەررورلىق قىلىس دەپ ەسەپتەيدى.

«اششىسايدا نۇرلان احمەتوۆ باۋىرىمىزعا جاسالعان قاستاندىقتى ەشقانداي اقىلعا سىيمايتىن قىلمىس دەپ باعالاۋىمىز كەرەك. ونى ءۇيىنىڭ قاسىندا توعىز جەردەن پىشاقتاپ، ازاپتاپ ولتىرگەن. بۇعان قاتارداعى جاي قىلمىس  نەمەسە ۇلتارالىق قاقتىعىس دەپ قاراۋعا بولمايدى. دەگەنمەن بۇل ىستە قازاق-شەشەن قاقتىعىسىنا بايلانىستى سوزدەر ايتىلادى. بىراق بۇنى تەك وسى ەكى ۇلتقا تىرەپ قويۋعا كەلمەيدى. وسىنىڭ باسىن اشىپ الايىق. مەن ءوز باسىم بۇنى تەررورلىق قىلمىس دەپ ەسەپتەيمىن... بۇنىڭ بارلىعى 2007 جىلعى وقيعادان باستالادى. بۇنى شەشەن دياسپوراسىنىڭ وكىلى ماحماحانوۆتار اۋلەتى جاساعان ارەكەت ەمەس پە؟ دەگەن كۇدىك بار»، - دەيدى سارسەنبايۇلى.

ىرىسبەك سارسەنبايۇلى نۇرلان احمتوۆتىڭ ولىمىنەن بولەك، 2007 جىلى بولعان قازاق-شەشەن وقيعاسىن تاعى بىرنەشە قىلمىسپەن بايلانىستىرادى.

«2002 جىلى الماتى قالاسىندا نۇرلان تۇرىسوۆتى ايەلىمەن بىرگە ۇيىندە اتىپ كەتتى. سول جەردە تابىلعان تت پيستولەتىنىڭ گيلزاسى كازاتكومدا تابىلعان وقپەن سايكەس كەلىپ وتىر. دەمەك، ونىڭ بۇل قىلمىسقا قاتىسى بار ما؟ بار. تاعى ءبىر قىلمىستىڭ جۋرناليست ورالعايشامەن قاتىسى بار. ول كىسى قازاقمىسپەن بايلانىسى بار ءىستى زەرتتەپ الماتىعا كەلگەن. ويتكەنى ماحماحانوۆتاردىڭ بىرەۋى سول جاقتا (قاراعاندىدا-رەد)  ادام ولتىرۋگە قاتىسى بار دەپ ۇستالعان. بىراق ىلە-شالا وسى جاققا ءۇي قاماققا جىبەرىلگەن. جۋرناليست وسىعان بايلانىستى ماقالا جازدى. كەيىننەن جوعالىپ كەتتى. ارتىندا ءبىر قىزى قالدى. تاعدىرى ءالى كۇنگە دەيىن بەلگىسىز. ءتىرى بولسا ءبىر جەردەن شىعار ەدى. ونى دا ءولتىرىپ كەتۋى ابدەن مۇمكىن. مىنا قىلمىستى قاراۋ كەزىندە وسى وقيعالارعا نازار اۋدارىلۋى كەرەك دەپ قوعامدىق كوميسسيا مۇشەلەرى تالاپ قويىپ وتىرمىز...»، - دەيدى سارسەنبايۇلى.

ءباسپاسوز ءماسليحاتى بارىسىندا كوميسسيا مۇشەلەرى نۇرلان احمەتوۆتىڭ ولىمىنە بايلانىستى قوزعالعان قىلمىستىق ءىستىڭ قالاي ءجۇرىپ جاتقانىن بىلمەيتىندەرىن، ءالى كۇنگە دەيىن قۇزىرلى ورگاندار تاراپىنان ەشقانداي جاۋاپ الماعاندارىن ايتتى. جيىن سوڭىندا بەلسەندىلەر اتالمىش ىسكە بايلانىستى پرەزيدەنت قاسىم-جومارت توقاەۆ پەن شەشەن دياسپوراسىنىڭ وكىلدەرىنە اشىق حات جولدايتىندارىن مالىمدەدى.

تامىزدىڭ 14-ءى كۇنى اششىساي اۋىلىندا جەرگىلىكتى تۇرعىن نۇرلان احمەتوۆ كىسى قولىنان كوز جۇمعان. ونى توعىز جەردەن پىشاقتاپ كەتكەن. تۋىستارى نۇرلاننىڭ ءولىمىن 2007 جىلى بايدىبەك بي اۋىلىندا بولعان قازاق-شەشەن قاقتىعىسىمەن بايلانىستىرعان. احمەتوۆقا بۇعان دەيىن دە بىرنەشە رەت قاستاندىق جاسالعان.

"The Qazaq Times"