Özbekstan prezidenti Şavhat Mirziyaev. Foto: sputniknews.kz

Säuirdiñ 4-5-i aralığında Şavhat Mirziyaev Özbekstan prezidenti retinde Reseyge öziniñ eñ alğaşqı resmi saparın jasadı. Resey prezidenti Vladimir Putinmen kezdesui barısında  Mäskeu men Taşkent arasında jalpı qwnı 16 mlrd dollardı qwraytın kelisim-şarttarğa qol qoyılğan. Kreml' özbek eline 12 mlrd dollar köleminde investiciya saluğa kelisken.

Islam Kärimovtıñ twsında jabıq esik rejimin wstanğan Özbek eliniñ jaña prezidentiniñ bwl saparına reseylik sarapşılar oñ bağa berude. Osığan deyin Özbekstannıñ jabıq sayasatın sınap kelgen Kreml' sarapşıları nege özgerip sala berdi? Mäskeudiñ  özbek prezidenti Şavhat Mirziyaevqa qwşağın ayqara aşuınıñ sırı nede? Bwl Vladimir Putin tarapınan jasalıp jatqan «qayırımdılıq akciyası ma»? Älde Özbek elin kedendik odaqqa kirgizudiñ alğı şarttarı ma?

Esteriñizde bolsa, Qırğızstandı Odaqqa kirgizer aldında da osığan wqsas qadamdar jasalğan bolatın. Astana, Bişkekke  Kedendik Odaqqa kiruge kömektesu maqsatında 100 mln dollar köleminde qarjı bergen.  Biraq, Özbekstan men Qırğızstandı salıstıruğa kelmeytini anıq. Resmi Taşkent, ekonomikalıq jağınan da, geosayasi salmağı jağınan da Qırğızstannan bäsi basım memleket. Al, Özbek eli men Reseydiñ jaqındasuı Aqordağa wnamauı mümkin. Öytkeni Ortalıq Aziyada Qazaqstanğa bäsekeles bola alatın birden bir el, ol – Özbekstan. Astanamen qatar Taşkenttiñ Kreml'men qarım-qatınasınıñ jaqsarğanın, AQŞ ta qoldaması anıq. Uaşingtonnıñ Auğanstanda ornalasqan äskeri bazalarına, Reseydiñ Özbekstan arqılı jaqındauı olardı da oylandırarı haq.

Ne de bolsa, Şavhat Mirziyaevtıñ Mäskeuge saparı Islam Kärimovtıñ wstanğan sayasatın jalğastırmaytının añğarttı. Özbek ağayındardıñ alda qanday sayasi qadamdarğa baratının uaqıt körseter. Al Islam Kärimovsız Özbekstannıñ, Ş.Mirziyaev basqarğan biligi basqaşaraq ekenin büginnen däleldep jatır.

“The Qazaq Times”