AQŞ prezidenti Donal'd Tramp Şıñjañdağı wyğır, qazaq jäne özge de mwsılmandardı qudalauğa atsalısqan Qıtaydıñ joğarı lauazımdı şeneunikterine sankciya engizu turalı şeşimge keldi.

Qwjatta: «Şıñjañdağı jekelegen mwsılman toptardıñ qwqıqtarın öreskel bwzudı ayıptaydı jäne naqtı twlğalarğa sankciya salu ökiletin beredi» – delingen. Aq üy basşısı Qıtayda biligi azşılıq wlttarğa qısım körsetip, adam qwqığın taptap otır dep mälimdedi.

«Wyğırlarğa qatıstı adam qwqığı salasındağı sayasat turalı» zañğa säykes prezident 120 kün işinde wyğırlardı qudalauğa atsalısqan qıtay şeneunikteriniñ tizimin jasaydı. Sonımen qatar AQŞ-tıñ arnayı qızmeti men memlekettik departamenti kongreske Qıtaydağı wyğırlardıñ jağdayı turalı twraqtı türde habar berip otıruğa mindetti.

Amerika biligimen qatar, halıqaralıq qwqıq qorğauşı wyımdar Qıtaydağı etnikalıq toptardıñ jağdayına basa nazar audaruda. Key derekter boyınşa Şıñjañdağı «sayasi lager'lerde» mıñdağan qazaq qamauda otır. Osığan deyin AQŞ qwqıq qorğauşıları Beyjiñdi Şıñjañdağı türkitildes mwsılmandarğa qarsı jüyeli nauqan wyımdastırıp keledi dep ayıptağan bolatın. Sonımen qatar olar «adam qwqığın taptap, key wlttarğa jazıqsızdan-jazıqsız qorlıq körsetip otırğan» QHR-dı «qwqıq saqtalmağan aymaq» dep atadı.

"The Qazaq Times"