Keşe, 10 naurızda bas prokuratura internette tarağan belsendi Dulat Ağadildiñ mäyitiniñ videosına baylanıstı «Körineu jalğan aqparat taratu» babımen qozğalğan qılmıstıq iske kuäger retinde birneşe belsendiden jauap aldı.

Prokuraturağa barğandar arasında erli-zayıptı Darhan jäne Dinara Ömirbaevtar, Medet Arıstanov pen Qayrat Seyitqaliev bar. Bas prokuraturadağı tergeu tüs aua üşte bastalıp, keşki onda ayaqtaldı. Bir top belsendiler olar şıqqanşa kütu zalında otırdı. Belsendiler men marqwmnıñ tuıstarı biliktiñ «qaza sebebi jönindegi nwsqasımen kelispeytinin», küdikpen qaraytının, sondıqtan dälel türinde videoğa tüsirgenin aytadı.

Abaqtıda belgisiz jağdayda köz jwmğan belsendiniñ anası Gülbarşın Jolmwhambetova: «Olar nege üyde äketken altı adamnıñ üstinen is qozğamay, osı uaqıtqa deyin jaybaraqat jür? Al men äleumettik jeliden alıp tasta degenimdi bwrmalap, tuıstarıma nege is qozğaydı?  Men oğan kelispeymin, soğan qaramastan is qozğaytın bolsa, organnıñ aldına barıp aştıq jariyalap otıramın. Jaqındarıma tınıştıq bersin! Olar meniñ balamnıñ jaqın joldastarı», – deydi.

Tergeuge belsendilermen birge olardıñ advokatı Gülşat Düysenova da qatıstı. Biraq ol «qwpiyanı jariya etpeu turalı» qağazğa qol qoyğanın aytıp, kommentariy beruden bas tarttı.

Azattıqtıñ habarlauınşa, keşe işki ister ministri Erlan Twrğımbaev ükimet otırısınan keyin jurnalisterge belsendi Ağadildiñ videosın taratu isi boyınşa qılmıstıq is qozğalğanın ayttı.

24 aqpanda azamattıq kiimdegi birneşe adam bilikke qarsı narazılıqtarda közge tüsken belsendi Dulat Ağadildi üyinen, tergeu izolyatorına alıp ketken. Oğan «sud'yağa bağınbadı» degen ayıppen is qozğalğan. 25 aqpanda belsendiniñ astanadağı tergeu izolyatorında qaza tapqan edi.

“The Qazaq Times”