كەشە، 10 ناۋرىزدا باس پروكۋراتۋرا ينتەرنەتتە تاراعان بەلسەندى دۋلات اعادىلدىڭ ءمايىتىنىڭ ۆيدەوسىنا بايلانىستى «كورىنەۋ جالعان اقپارات تاراتۋ» بابىمەن قوزعالعان قىلمىستىق ىسكە كۋاگەر رەتىندە بىرنەشە بەلسەندىدەن جاۋاپ الدى.

پروكۋراتۋراعا بارعاندار اراسىندا ەرلى-زايىپتى دارحان جانە دينارا ومىرباەۆتار، مەدەت ارىستانوۆ پەن قايرات سەيىتقاليەۆ بار. باس پروكۋراتۋراداعى تەرگەۋ ءتۇس اۋا ۇشتە باستالىپ، كەشكى وندا اياقتالدى. ءبىر توپ بەلسەندىلەر ولار شىققانشا كۇتۋ زالىندا وتىردى. بەلسەندىلەر مەن مارقۇمنىڭ تۋىستارى بيلىكتىڭ «قازا سەبەبى جونىندەگى نۇسقاسىمەن كەلىسپەيتىنىن»، كۇدىكپەن قارايتىنىن، سوندىقتان دالەل تۇرىندە ۆيدەوعا تۇسىرگەنىن ايتادى.

اباقتىدا بەلگىسىز جاعدايدا كوز جۇمعان بەلسەندىنىڭ اناسى گۇلبارشىن جولمۇحامبەتوۆا: «ولار نەگە ۇيدە اكەتكەن التى ادامنىڭ ۇستىنەن ءىس قوزعاماي، وسى ۋاقىتقا دەيىن جايباراقات ءجۇر؟ ال مەن الەۋمەتتىك جەلىدەن الىپ تاستا دەگەنىمدى بۇرمالاپ، تۋىستارىما نەگە ءىس قوزعايدى؟  مەن وعان كەلىسپەيمىن، سوعان قاراماستان ءىس قوزعايتىن بولسا، ورگاننىڭ الدىنا بارىپ اشتىق جاريالاپ وتىرامىن. جاقىندارىما تىنىشتىق بەرسىن! ولار مەنىڭ بالامنىڭ جاقىن جولداستارى»، – دەيدى.

تەرگەۋگە بەلسەندىلەرمەن بىرگە ولاردىڭ ادۆوكاتى گۇلشات دۇيسەنوۆا دا قاتىستى. بىراق ول «قۇپيانى جاريا ەتپەۋ تۋرالى» قاعازعا قول قويعانىن ايتىپ، كوممەنتاري بەرۋدەن باس تارتتى.

ازاتتىقتىڭ حابارلاۋىنشا، كەشە ىشكى ىستەر ءمينيسترى ەرلان تۇرعىمباەۆ ۇكىمەت وتىرىسىنان كەيىن جۋرناليستەرگە بەلسەندى اعادىلدىڭ ۆيدەوسىن تاراتۋ ءىسى بويىنشا قىلمىستىق ءىس قوزعالعانىن ايتتى.

24 اقپاندا ازاماتتىق كيىمدەگى بىرنەشە ادام بيلىككە قارسى نارازىلىقتاردا كوزگە تۇسكەن بەلسەندى دۋلات اعادىلدى ۇيىنەن، تەرگەۋ يزولياتورىنا الىپ كەتكەن. وعان «سۋدياعا باعىنبادى» دەگەن ايىپپەن ءىس قوزعالعان. 25 اقپاندا بەلسەندىنىڭ استاناداعى تەرگەۋ يزولياتورىندا قازا تاپقان ەدى.

“The Qazaq Times”