«The Qazaq Times» aqparattıq, qoğamdıq-sayasi portalınıñ qazaqtildi BAQ qatarında, äsirese elimizdegi sanaulı ğana täuelsiz basılımdar sapında qızmet etip kele jatqanına üş jıl toldı. Tağı da qaytalap aytar bolsaq öz wstanımımızğa say eşkimniñ tapsırmasın orındamadıq jäne reyting jarısına da tüspedik. Qazaq halqına, qazaq memleketine älemniñ är tükpirinde bolıp jatqan türli qoğamdıq-sayasi, äleumettik jağdaylardı eş bwrmalausız qaz-qalpında jetkizuge küş saldıq. Biıl da el işindegi qoğamdıq-sayasi jağdaydı jiti qadağalauğa tırıstıq.

Jıl basında bolğan bes säbidiñ qayğılı qazasınan bastap küni keşe ğana orın alğan äue apatına deyin, bilik tranziti jäne merziminen bwrın ötkizilgen prezident saylauı sonday-aq Almatı qalasında orın alğan mitingiler, beybit twrğındar men qwzırlı organdar arasındağı türli qarım-qatınas jöninde de, azamattıq qoğamnıñ alğaşqı otın twtandırğan jas buın wyımdastırğan is-şaralardı barınşa qalıñ qauımğa jetkizuge küş saldıq.

Ötken künderdiñ esteliginde qalatın 2019 jılı da jurnalisterimiz älemniñ är qiırındağı eleuli oqiğalardı, auqımdı mäselelerdi qazaq qoğamına jetkizip, olardıñ jahandıq wlı köşte kele jatqan Qazaqstan sındı elimizge tigizetin oñ nemese teris ıqpaldarı turalı, el işindegi äleumettik, qoğamdıq-sayasi ahualdar jöninde jurnalistik oyların jetkizip otırdı.

Aytalıq, AQŞ-Qıtay qarım qatınası, Korey tübegindegi dağdarıs jäne beybitşilik procesi, sauda soğısı, Gonkong dağdarısı, Ündi-Tınıq mwhit köşbasşılığına talas, AQŞ-Iran dağdarsı, Idlib dağdarsı, Auğanstan jağdayı, jahandıq jılınu jäne klimat özgeristeri jaylı Estay Bojan nazarına wstağan bolsa (https://qazaqtimes.com/en/author/4);

AQŞ sankciyaları, Tramp impiçmenti, Wlıbritaniyadağı Brexit, Germaniyadağı migraciyalıq mäseleler, Franciyadağı «sarı jeydeliler» ereuili, Resey-Ukraina baylanısı, «aral dauı», Türkiyanıñ Süriyadağı äskeri operaciyası, Meksikadağı «migranttar kerueni», Venesuela dağdarısı, jahandanu jağdayındağı Japoniya siyaqtı halıqaralıq sayasi ahualdardı Aray Jwmatay saraptap jazdı. (https://qazaqtimes.com/author/20)

Jer-jahan jağdayattarına qosa, jıl basınan bastalğan köp balalı analardıñ qoğamdıq rezonans tudıruı, eldi otız jılğa tayau bilegen Nazarbaevtıñ bilikten ketui, merzimnen bwrınğı prezident saylauı sındı el işiniñ de bastı äleumettik-sayasi ahualın qalıs qaldırmauğa küş saldıq. Qauipsizdik keñesi, «Jaña Qazaqstan», Qıtay qazaqtarı mäselesi, Arıstağı apat,  İşki ister ministrliginiñ reforması, Halıq qwrıltayı, partiya qwrudı közdeytin «Respublika», «Oyan, Qazaqstan» azamattıq qozğalısı, «Jastar jılı», eldegi sayasi señniñ säl de bolsa jibigenin ayğaqtaytınday endi qwrılıp jatqan demokratiyalıq partiya, prezident Toqaev sayasatındağı bastamalar men kemşilikter sındı özekti mäselelerge portalımızdıñ jurnalisteri Esdäulet Qızırbekwlı(https://qazaqtimes.com/author/9) jäne Asan Anarbaywlı üzdiksiz nazar salıp otırdı (https://qazaqtimes.com/author/27).

«The Qazaq Times» portalınıñ qwrılğanına 3 jıl toluına oray, osığan deyin bizge senim artqan twraqtı oqırmandarımızğa alğısımızdı bildiremiz. Äri, aldağı uaqıtta da jahandıq jäne el işiniñ jağdaylarına birge nazar audaramız dep senemiz.

“TheQazaqTimes”