«The Qazaq Times» اقپاراتتىق، قوعامدىق-ساياسي پورتالىنىڭ قازاقتىلدى باق قاتارىندا، اسىرەسە ەلىمىزدەگى ساناۋلى عانا تاۋەلسىز باسىلىمدار ساپىندا قىزمەت ەتىپ كەلە جاتقانىنا ءۇش جىل تولدى. تاعى دا قايتالاپ ايتار بولساق ءوز ۇستانىمىمىزعا ساي ەشكىمنىڭ تاپسىرماسىن ورىندامادىق جانە رەيتينگ جارىسىنا دا تۇسپەدىك. قازاق حالقىنا، قازاق مەملەكەتىنە الەمنىڭ ءار تۇكپىرىندە بولىپ جاتقان ءتۇرلى قوعامدىق-ساياسي، الەۋمەتتىك جاعدايلاردى ەش بۇرمالاۋسىز قاز-قالپىندا جەتكىزۋگە كۇش سالدىق. بيىل دا ەل ىشىندەگى قوعامدىق-ساياسي جاعدايدى ءجىتى قاداعالاۋعا تىرىستىق.

جىل باسىندا بولعان بەس ءسابيدىڭ قايعىلى قازاسىنان باستاپ كۇنى كەشە عانا ورىن العان اۋە اپاتىنا دەيىن، بيلىك ءترانزيتى جانە مەرزىمىنەن بۇرىن وتكىزىلگەن پرەزيدەنت سايلاۋى سونداي-اق الماتى قالاسىندا ورىن العان ميتينگىلەر، بەيبىت تۇرعىندار مەن قۇزىرلى ورگاندار اراسىنداعى ءتۇرلى قارىم-قاتىناس جونىندە دە، ازاماتتىق قوعامنىڭ العاشقى وتىن تۇتاندىرعان جاس بۋىن ۇيىمداستىرعان ءىس-شارالاردى بارىنشا قالىڭ قاۋىمعا جەتكىزۋگە كۇش سالدىق.

وتكەن كۇندەردىڭ ەستەلىگىندە قالاتىن 2019 جىلى دا جۋرناليستەرىمىز الەمنىڭ ءار قيىرىنداعى ەلەۋلى وقيعالاردى، اۋقىمدى ماسەلەلەردى قازاق قوعامىنا جەتكىزىپ، ولاردىڭ جاھاندىق ۇلى كوشتە كەلە جاتقان قازاقستان سىندى ەلىمىزگە تيگىزەتىن وڭ نەمەسە تەرىس ىقپالدارى تۋرالى، ەل ىشىندەگى الەۋمەتتىك، قوعامدىق-ساياسي احۋالدار جونىندە جۋرناليستىك ويلارىن جەتكىزىپ وتىردى.

ايتالىق، اقش-قىتاي قارىم قاتىناسى، كورەي تۇبەگىندەگى داعدارىس جانە بەيبىتشىلىك پروتسەسى، ساۋدا سوعىسى، گونكونگ داعدارىسى، ءۇندى-تىنىق مۇحيت كوشباسشىلىعىنا تالاس، اقش-يران داعدارسى، يدليب داعدارسى، اۋعانستان جاعدايى، جاھاندىق جىلىنۋ جانە كليمات وزگەرىستەرى جايلى ەستاي بوجان نازارىنا ۇستاعان بولسا (https://qazaqtimes.com/en/author/4);

اقش سانكتسيالارى، ترامپ يمپيچمەنتى، ۇلىبريتانياداعى Brexit, گەرمانياداعى ميگراتسيالىق ماسەلەلەر، فرانتسياداعى «سارى جەيدەلىلەر» ەرەۋىلى، رەسەي-ۋكراينا بايلانىسى، «ارال داۋى»، تۇركيانىڭ سۇرياداعى اسكەري وپەراتسياسى، مەكسيكاداعى «ميگرانتتار كەرۋەنى»، ۆەنەسۋەلا داعدارىسى، جاھاندانۋ جاعدايىنداعى جاپونيا سياقتى حالىقارالىق ساياسي احۋالداردى اراي جۇماتاي ساراپتاپ جازدى. (https://qazaqtimes.com/author/20)

جەر-جاھان جاعداياتتارىنا قوسا، جىل باسىنان باستالعان كوپ بالالى انالاردىڭ قوعامدىق رەزونانس تۋدىرۋى، ەلدى وتىز جىلعا تاياۋ بيلەگەن نازارباەۆتىڭ بيلىكتەن كەتۋى، مەرزىمنەن بۇرىنعى پرەزيدەنت سايلاۋى سىندى ەل ءىشىنىڭ دە باستى الەۋمەتتىك-ساياسي احۋالىن قالىس قالدىرماۋعا كۇش سالدىق. قاۋىپسىزدىك كەڭەسى، «جاڭا قازاقستان»، قىتاي قازاقتارى ماسەلەسى، ارىستاعى اپات،  ىشكى ىستەر مينيسترلىگىنىڭ رەفورماسى، حالىق قۇرىلتايى، پارتيا قۇرۋدى كوزدەيتىن «Respublika»، «ويان، قازاقستان» ازاماتتىق قوزعالىسى، «جاستار جىلى»، ەلدەگى ساياسي سەڭنىڭ ءسال دە بولسا جىبىگەنىن ايعاقتايتىنداي ەندى قۇرىلىپ جاتقان دەموكراتيالىق پارتيا، پرەزيدەنت توقاەۆ ساياساتىنداعى باستامالار مەن كەمشىلىكتەر سىندى وزەكتى ماسەلەلەرگە پورتالىمىزدىڭ جۋرناليستەرى ەسداۋلەت قىزىربەكۇلى(https://qazaqtimes.com/author/9) جانە اسان اناربايۇلى ۇزدىكسىز نازار سالىپ وتىردى (https://qazaqtimes.com/author/27).

«The Qazaq Times» پورتالىنىڭ قۇرىلعانىنا 3 جىل تولۋىنا وراي، وسىعان دەيىن بىزگە سەنىم ارتقان تۇراقتى وقىرماندارىمىزعا العىسىمىزدى بىلدىرەمىز. ءارى، الداعى ۋاقىتتا دا جاھاندىق جانە ەل ءىشىنىڭ جاعدايلارىنا بىرگە نازار اۋدارامىز دەپ سەنەمىز.

“TheQazaqTimes”