Putin men Zelenskiydiñ kelissözi Parijde ötpek. Foto: Delo.ua

Resey men Ukraina basşıları kelesi aptada Parijde Ukrainanıñ ükimet küşteri men el şığısındağı reseyşil bülikşiler arasındağı bes jıldıq soğıstı ayaqtau üşin alğaşqı betpe-bet kezdesuler ötkizedi. Bwl europalıq sammittiñ kün tärtibinde orın alğan.

Ukraina ükimet küşteri men el şığısındağı bölşekteuşi reseyşil küşter arasında 5 jılğa sozılğan qaqtığıstardan 13 mıñnan astam adamnıñ qaza tapqanı belgili. Osı jıldar işined Mäskeu tarabı Ukraina şığısındağı qaqtığıstarğa reseylik äskerlerdiñ qatıspağanın alğa tartıp keldi. Äri ondağı bölşekteuşi küşterdi beytarap qarastırıp kelgen. Europa tarabı mäseleni kelissöz üsteline şığaruğa san märte tırısqan. Alayda, bwdan nätije bolmağan.

Ukraina mäselesi 5 jıldıq şieleniske jetken twsta el biligine Zelenskiy keldi. Ol saylau aldı uädeleriniñ birinde Ukrainanıñ şığısındağı soğıstı toqtatatının aytıp edi. Zelenskiy biliginiñ öz uädesi jöninde alğaşqı adımdağı jetistigi de joq emes. Qırküyek ayında Resey men Ukraina twtqındardı almastırdı.

Keybir sarapşılardıñ pikirinşe, Zelenskiydiñ osı uädesi Kreml'ge de mümkindik bergen. Aytalıq, Ukrainanıñ jas prezidenti bergen uäde asa salmaqtı jäne ol onıñ orındaluın ümit etedi. Bwl Resey üşin jaña talaptar men kelissöz şarttarın wsınu üşin tamaşa oray.

Eki eldiñ kelissözine äser etken faktorlardıñ biri – Zelenskiy efekti.  Zelenskiydiñ sayasatqa keluge deyingi beynesi jäne onıñ äzilderi Reseyge de keñ tarağan. Onıñ özi reseylikterdiñ közqarasına äser etkenin de ayta ketu kerek. Basqa da mañızdı faktorlardıñ bar ekeni belgili.

Sarapşılar Parijdegi kelissözde Resey mwnayı men gazınıñ Ukraina arqılı Europağa ötui jäne Lugansk pen Donbastağı soğıs sındı eki mäsele «saudağa tüsui» mümkin dep qaraydı.

“The Qazaq Times”