Afrikalıq qwldardı tiegen alğaşqı kemeniñ Virdjiniyağa jetui. Foto: The New York Times.

AQŞ-tağı älemge tanımal basılım New York Times Magazine jurnalı Amerikadağı qwldıqtıñ bastalğanına 400 jıl toluına oray iri jobanı bastağan bolatın. Alayda, atalğan basılımnıñ äreketi amerikalıq sayasatkerler jağınan auır sınğa wşıradı. Respublikaşıldar partiyasınıñ ökilderi atalğan basılımnıñ kötergen jobasın "propaganda" qatarında bağaladı jäne "Pravda" basılımımen salıstırğan sın-pikirlerdi qarşa borattı.

New York Times Magazine jurnalınıñ Amerikadağı qwldıqtıñ 400 jıldığına arnağan jobasınıñ atı "1619" dep ataladı. Afrikadan qwldardı tasığan Wlıbritaniyanıñ kemesi alğaş ret Virdjiniya ştatına 1619 jılı baradı. Sondıqtan da, basılım Amerikadağı qwldıqtıñ 400 jıldığına arnağan jobasına "1619" degen at bergen.  Amerikadağı qwldıq, qwldau, qwl saudasına qatıstı materialdar basılımnıñ gazeti men jurnalına jariyalana bastadı. Aldağı uaqıtta saytına da şıqpaq.

Amerikalıq sayasatkerler jağınan qarsılıqqa wşırağanımen zertteuşiler, tarihşılar, publicistter men doktorant sayasattanuşılar jağınan oñ pikirge ie bolğan. Al, respublikaşıldar men konservativtik publicistter onı tarihtı qayta öñdep jazu, aqiqattı bwrmalau äreketi qatarında bağalap jatır.

Amerikadağı qwldıq, qwldau äreketteri resmi derekter boyınşa 1619 jılı bastaladı. Onıñ soñı 250 jılğa deyin jalğasıp, josparlı ekonomikanı qwraydı. Qwrama Ştattarda qara näsildilerdi qwldauğa bwdan 150 jıl bwrın şekteu qoyılsa da, näsildik kemsituşilik, terisiniñ tüsine qaray qaqpaylau, şetke qağu tağı bir ğasırdan astam uaqıtqa deyin jalğasqan.

The New York Times basılımı atalğan jobasında Amerikadağı qwldıqtıñ tarihi naqtı derekterin jariyalap qana qoymay, teñsizdiktiñ mädenietke, ekonomikağa, densaulıq saqtauğa jäne özge de qoğamdıq twrmısqa tigizgen äserleri turalı da materialdar jariyalanadı. Jobada qara näsildi tanımal avtorlardıñ näsildik teñsizdikke qatıstı reportajdarı, tarihi esseler, poeziya jäne suretteri jariyalanadı.

Degenmen, keybir qarapayım AQŞ azamattarı da atalğan jobanı qoldamay qoymaytının bildirude. Olar äleumettik jelidegi pikirinde atalğan joba äleumettik pikirdi ekige bölip, qoğamdıq jarılısqa alıp keledi dep sanaydı.

“The Qazaq Times”