Foto Ermwrat Bapidıñ Feysbuk paraqşasınan alındı.

Aqorda biligi «Aqiqattan» qauiptene bastadı, – dep jazadı Ermwrat Bapi öziniñ Feysbuk paraqşasında.

QR Ädilet ministrligi «Aqiqat» partiyasınıñ jaña atauın memlekettik tirkeuge aludan bas tarttı (fotoköşirmeni qarañız). Ministrliktiñ köldeneñ tartqan uäji – Qazaqstanda «aqiqat» sözin qoldanğan basqa wyım – «Jeltoqsan aqiqatı» degen birlestik bar eken: «Biznes-säykestendiru nömirleriniñ wlttıq tiziminiñ mälimetterine säykes, «Patriottıq qozğalıs «Jeltoqsan aqiqatı» respublikalıq qoğamdıq birlestigi tirkelgen» (qaz-qalpında) dep, «Aqiqat» partiyasın tirkeuge almaudıñ amal-aylasın jasaptı.
Aqordanıñ aytuımen jasalğan bwl jaltarma äreket qazaqstandıq zañdar normasına qayşı keletini bılay twrsın, sonımen birge filologiyalıq-tildik-leksikalogiyalıq normalarğa da säykes kelmeydi. Qoldanıstağı «Jeltoqsan aqiqatı» men «Aqiqat partiyası» degen tirkester män-mağınalıq jağınan bir-birin qaytalamaytın wğımdardı bildiretinin til mamandarı däleldep, jiktep bere aladı dep oylaymın.
Ekinşiden, elde bir sözdiñ negizinde qwrılğan wyımdar men ataular az ba? Bir ğana «nwr» sözin alayıq: «Nwr Otan partiyası», «Nwr-Swltan qalası», «Nwr-Astana meşiti», «Nwr-Astana gazeti», «Nwr-Astana medresesi», «Nwr-Astana qwrılıs kompaniyası»... nemese «Habar agenttigi», «Habar-24» TV-arnası», «Damu qorı», «Damu jurnalı», «Astana-damu» degen bir-birin qaytalaytın ataular örip jür.

Endeşe, bwl ataular nege «biznes-säykestendiru nömirleriniñ wlttıq tizimine säykes» keledi de, «Aqiqat partiyası» men «Jeltoqsan aqiqatı» bir-birin qaytalaytın ataular bolıp şığadı? «Nwr» tıqpalanbağan tesik, jamalmağan jırtıq qalmadı, al «aqiqat» atauı nege «wlttıq tizimge» säykes kelmeydi?
2019 jıldıñ 26-säuirinde ötken JSDP partiyasınıñ s'ezinde qabıldanğan «Aqiqat» atauın qaytkende de memlekettik tirkeuge almaudıñ astarında sayasi sipat bar dep oylaymın. Aqorda biligi bas kötere bastağan eldegi jalğız täuelsiz partiyanı halıqtıq qoldauğa ie boldırmaudıñ oraşolaq äreketine kirise bastadı. Onıñ bastı maqsatı – aldağı parlamenttik saylauda «Aqiqat» atauın alğan partiyanıñ aybını basım bolmasın degen mısıqtileu.
Biraq biz ministrliktiñ mwnday ayla-äreketimen kelispeymiz jäne bwl şeşimniñ zañ ayasında da, tildik-filologiyalıq qoldanıs twrğısında da eşqanday logikağa säykes kelmeytinin däleldep, sotqa şağım tüsiru procesin bastadıq. Biz bwl qarsılıq äreketke zañgerlerdi ğana emes, til mamandarın, qwqıq qorğauşı wyımdardı, eldegi şeteldik diplomatiyalıq korpus ökilderin tartudı qolğa aldıq.

Foto Ermwrat Bapidıñ Feysbuk paraqşasınan alındı.

Eñ qızığı – bwğan deyin bwyığı jatqan partiyanı biz qalay oyatamız, onıñ sayasi-qoğamdıq mañızı men el-jwrtqa qajetti jalğız partiya ekenin qalay däleleldeymiz dep, bas qatırıp jürgenimizde, bizge biliktiñ özi kömekke keldi: endi biz Joğarğı sotqa deyin sozılatın wzaq procesti PiAr-tehnologiya retinde paydalanatın bolamız.

"The Qazaq Times"