Qarulı küşterdiñ şerui. Foto: Russia Insider

Naurız ayı tua salısımen älem elderiniñ äskeri äreketteri, qarulı qimıldarı jiileude. Aqpan ayınıñ soñına qaray Resey men NATO arasındağı jauaptasular älemdi dürliktirgen edi. Şeşimi tabılsa da bitimi joq Süriya (Siriya) mäselesi äli de qarulı küşterdiñ şuına tolı. Kaspiydiñ arğı betinde Äzirbayjan men Armeniya arasındağı janjalda basılmay twr. Bwlarğa endi dünieniñ şığısınan Korey tübegi janjalı kelip qosıldı.

Saytımızda Oñtüstik-Soltüstik Koreyalar arasındağı qayşılıqtar habarlanıp keledi. Ötken aydıñ soñğı künderi resmi Seul tarabı «Sad» (Thaad) jüyesin ornatatın orındı twraqtandırğanın habarlap edi, köktem mausımınıñ alğaşqı künin AQŞ-Koreya birlesken armiyasınıñ äskeri oqu-jattığuımen bastadı. Qazir tübek jağdayı soğıs tuıludıñ az-aq aldında twr deuge boladı. Bügin şetel BAQ-tarınan Resey men Qıtay, Soltüstik Koreya «Sad» jüyesine ortaq qarsı twrudı keñesip jatqanı mälim boldı. Sonday-aq, Resey men Qıtay ıqpalında Şanhay ıntımaqtastıq-qauipsizdik wyımı işinde de bir qatar äreketter bilindi. Resey prezidentiniñ Qazaqstan, Qırğızstan, Täjikstandağı beyresmi saparı, Şanhay ıntımaqtastıq-qauipsizdik wyımına müşe elderdiñ äskeri ister ökilderiniñ  Astanadağı keşegi otırısı. Şığıs pen batıstağı qauırt jürip jatqan äskeri äreketter tosın ürey tanıtarlıqtay.

Orta Şığıs jäne Tayau-Şığıs dürbeleñge boyı üyrendi degen künniñ özinde, Iran mwsılman elderin Palestina azattığı üşin küreske şaqıruı, atalğan öñirdiñ aldağı jıldardağı bastı taqırıbın aldın ala sezdirip twrsa kerek. Izrail'diñ Palestinanı jaulap, islam elderine jasağan büligin, Iran eş uaqıtta keşire almaytının aşıq aytıp otır. Süriya, Litva, Irak, Mısır, Libiya qatarlı zamanında islam elderi arasında damudan köş bastağan elderdiñ bügingi tas-talqan küyi artqı şef islam elderin oylandırsa kerek.

Iran aqparattıq agenttigi, bügin, AQŞ «Del'ta» arnaulı küşteriniñ DAIŞ lañkestik tobınıñ jetekşisi Äbubäkir äl-Bağdadidı Mosuldıñ batısınan şığaruğa küş salıp jatqanın habarlay kelip, Iran Islam Respublikasınıñ Süriya tınıştığın qalpına keltiru üşin jasağan eñbegin öz attarına jazıp aluda dep sınğa aldı. Ne dese de qazir qoldan jasalğan DAIŞ sol jasauşılardıñ qolımen talqandalıp jatır. DAIŞ şabuıldarı tolastay bere tıñ bir taqırıptıñ tuarı anıq. Sebebi, Izrail öziniñ Palestinadağı qala qwrılıstarın äli ayaqtatıp bolğan joq.

Al, bizge Käspi arqılı twtasatın körşi Äzerbayjan qarulı küşteri, keşe tüsten keyin,  maydan jelisinde Armeniya armiyası ştab päter retinde qoldanğan keybir bekinisterdi talqandağan. Bwl turalı Anadolı aqparat agenttigi habarlap otır. Äzerbayjan tarabınıñ aytısına qarağanda bwl Armeniyanıñ kelisimdi bwzğanı üşin qaytarğan jauaptarı bolıp tabıladı. Alayda şabuıl saldarınan ölgen, jaralanğan adamdardıñ sanı turalı aqparattı taratpadı.

Şığısta äskeri derjavalar Korey tübeginde tireskeli twrsa, Batısta ekonomikalıq, ideologiyalıq teke-tirester üşin qarapayım halıq zardap şegude. Älemdi äbigerge salğan qaqtığıs ortalarınıñ bäri de qoldan jasalıp, qoldan örbitilgen qayşılıqtar ekenin bayqau qiın emes. Älemniñ beybitşiligin jaqtağan biz üşin, bwlardıñ eş qatısı joqtay köringenimen, äldiniñ taqımında ketip jatqan älsiz elderdiñ müddeleri sabaq bolmay ma?! Qazaqstan qorğanuğa qabletti qarulı qosınınıñ quatın äli de bolsa arttıruı kerek ekenin älemniñ dürbeleñi dabıl qağıp eskertude.

“The Qazaq Times”