Vladimir Zelenskiy Ukraina halqınıñ aldında ant qabıldadı

Vladimir Zelenskiy Ukraina halqınıñ aldında ant qabıldadı.

Mamır ayınıñ 20-ı küni Joğarı Radada Vladimir Zelenskiydiñ wlıqtau räsimi ötti. Oğan Ukrainanıñ eks-prezidentteri Leonid Kravçuk, Leonid Kuçma, Viktor YUşenko jäne Petr Poroşenko qatıstı.

Ant qabıldau räsiminen keyin söz söylegen Vladimir Zelenskiy Ukrainadağı äleumettik mäselelerge toqtaldı.

«Ükimet bizdiñ mäselemizdi şeşpeydi. Ükimettiñ özi – bizdiñ mäselemiz. Parlamentte keleşek wrpaqtıñ qamın oylaytındar ğana otıruı kerek» - dep mälimdedi.

Jaña perzident Joğarı Radadan deputattardıñ tiispeuşilik märtebesin alıp tastaudı, Ukraina qauipsizdik qızmetiniñ basşısın, qorğanıs ministri men bas prokurordı qızmetinen ketirudi swradı jäne bwl mäseleni şeşu üşin halıq qalaulılarına eki ay uaqıt berdi.

Bwdan bölek Vladimir Zelenskiy älemdegi barlıq ukrainalıqtardı biriguge şaqırdı.

«Biz biriguimiz kerek. Sol kezde ğana mıqtı bolamız. Älemdegi barlıq ukrainalıqtarğa aytarım – biz 65 millionbız. Sizder bizge kereksizder, mıqtı da quattı Ukrainanı qwruğa ärqaysıñız qajetsizder. Sizderge Ukraina azamattığın beruge uäde beremin. Bwl – bizdiñ wlttıq ideyamız» - dep mälimdedi Zelenskiy.

Wlıqtau räsimine AQŞ, Kanada, Latviya, Litva, Estoniya, Gruziya, Äzirbayjan, Moldova, Pol'şa, Slovakiya elderiniñ ökilderi qatıstı. Qazaqstan atınan inauguraciyağa parlament senatı törağasınıñ orınbasarı  Bektas Beknazarov bardı.

Ukrainada prezident saylauınıñ ekinşi kezeñi säuir ayınıñ 21-i küni ötken. Onda Vladimir Zelenskiy halıqtıñ 73,2 payız dauısın alıp, jeñiske jetken. Onıñ bastı qarsılası Petr Poroşenko saylau nätijesin moyındaytındığın jäne aldağı prezident saylauına qatısatındığın mälimdegen.

"The Qazaq Times"