Iä, qoğamda señ qozğaldı desek te bolar. Turasın aytqanda, Almatı oblısınıñ äkimi Amandıq Batalovtıñ mwrındıq boluımen monşada twrıp jatqan talğarlıq otbasığa su jaña baspana berildi. 

Bilseñiz, bes balanıñ ırızdığınan baspanağa qol jetkizgen ata-ananıñ quanışında şek bolsın ba?! Igi istiñ jüzege asu jolı da qarapayım. Täñerteñgisin oblıs basşısı messendjer arqılı kelgen beyne roliktı köredi.

– Men sizderdiñ jağdaylarıñızdı bilgende käsipkerlerdi kömek körsetuge şaqırdım. Asqar Fazılwlı qol wşın berdi, endi mine bwl jaña üy sizderdiki. Baqıttı bolıñızdar, – dedi oblıs äkimi.

Osılayşa, laşıqta ömir süruge mäjbür bolğan otbası bir künde Twrar Rısqwlov kentindegi su jaña üydiñ iesi atanıp otır.

– Biz byudjet qarajatınan bastap mecenattarğa jügingenge deyin qoldaudıñ türli nısandarın paydalana otırıp, osınday otbasılarğa kömektesuge tırısamız, – deydi oblıs äkiminiñ baspasöz qızmetiniñ jetekşisi Ğalımwrat Jükel. 

Endi quanış  iesi turalı birer auız söz. Jas otbası Quanış pen Maqpal Janbolatovtar Wyğır audanınıñ tuması. Jas ta bolsa köpbalalı otbası atanğan şañıraq. Bwl otbasınıñ balaları 2011, 2013, 2014, 2016 jäne 2018 düniege kelgen. Otağası balalar üyinde ösken. Alayda, sol qolındağı sausaqtarınıñ jartısınıñ joqtığı men sol köziniñ körmeytini de onıñ jigerin jığıp, aynalasına alaqan jaydırğan emes. Bazar jağalap tapqan-tayanğanın  tüsuge emes, twruğa jaldağan monşa üşin jwmsağan. YAğni, ay sayın 17 mıñ teñge tölep otırıptı.

Osılay bola twra ol büginge deyin mügedektikke qwjat tapsırmağan. Äkimdik ökilderiniñ aytuınşa, osığan baylanıstı Talğar audandıq äkimdiginiñ kömegimen ataulı äleumettik kömek aluğa jäne mügedektik boyınşa järdemaqı räsimdeuge qwjattar jinaqtalıp, dayındaluda.

Ayta keteyik, monşada twratın otbası video mälimet Facebook jelisindegi Online Qazaqstan tobında jariyalanğan bolatın.

"The Qazaq Times"