ءيا، قوعامدا سەڭ قوزعالدى دەسەك تە بولار. تۋراسىن ايتقاندا، الماتى وبلىسىنىڭ اكىمى اماندىق باتالوۆتىڭ مۇرىندىق بولۋىمەن مونشادا تۇرىپ جاتقان تالعارلىق وتباسىعا سۋ جاڭا باسپانا بەرىلدى. 

بىلسەڭىز، بەس بالانىڭ ىرىزدىعىنان باسپاناعا قول جەتكىزگەن اتا-انانىڭ قۋانىشىندا شەك بولسىن با؟! يگى ءىستىڭ جۇزەگە اسۋ جولى دا قاراپايىم. تاڭەرتەڭگىسىن وبلىس باسشىسى مەسسەندجەر ارقىلى كەلگەن بەينە روليكتى كورەدى.

– مەن سىزدەردىڭ جاعدايلارىڭىزدى بىلگەندە كاسىپكەرلەردى كومەك كورسەتۋگە شاقىردىم. اسقار فازىلۇلى قول ۇشىن بەردى، ەندى مىنە بۇل جاڭا ءۇي سىزدەردىكى. باقىتتى بولىڭىزدار، – دەدى وبلىس اكىمى.

وسىلايشا، لاشىقتا ءومىر سۇرۋگە ءماجبۇر بولعان وتباسى ءبىر كۇندە تۇرار رىسقۇلوۆ كەنتىندەگى سۋ جاڭا ءۇيدىڭ يەسى اتانىپ وتىر.

– ءبىز بيۋدجەت قاراجاتىنان باستاپ مەتسەناتتارعا جۇگىنگەنگە دەيىن قولداۋدىڭ ءتۇرلى نىساندارىن پايدالانا وتىرىپ، وسىنداي وتباسىلارعا كومەكتەسۋگە تىرىسامىز، – دەيدى وبلىس اكىمىنىڭ ءباسپاسوز قىزمەتىنىڭ جەتەكشىسى عالىمۇرات جۇكەل. 

ەندى قۋانىش  يەسى تۋرالى بىرەر اۋىز ءسوز. جاس وتباسى قۋانىش پەن ماقپال جانبولاتوۆتار ۇيعىر اۋدانىنىڭ تۋماسى. جاس تا بولسا كوپبالالى وتباسى اتانعان شاڭىراق. بۇل وتباسىنىڭ بالالارى 2011, 2013, 2014, 2016 جانە 2018 دۇنيەگە كەلگەن. وتاعاسى بالالار ۇيىندە وسكەن. الايدا، سول قولىنداعى ساۋساقتارىنىڭ جارتىسىنىڭ جوقتىعى مەن سول كوزىنىڭ كورمەيتىنى دە ونىڭ جىگەرىن جىعىپ، اينالاسىنا الاقان جايدىرعان ەمەس. بازار جاعالاپ تاپقان-تايانعانىن  تۇسۋگە ەمەس، تۇرۋعا جالداعان مونشا ءۇشىن جۇمساعان. ياعني، اي سايىن 17 مىڭ تەڭگە تولەپ وتىرىپتى.

وسىلاي بولا تۇرا ول بۇگىنگە دەيىن مۇگەدەكتىككە قۇجات تاپسىرماعان. اكىمدىك وكىلدەرىنىڭ ايتۋىنشا، وسىعان بايلانىستى تالعار اۋداندىق اكىمدىگىنىڭ كومەگىمەن اتاۋلى الەۋمەتتىك كومەك الۋعا جانە مۇگەدەكتىك بويىنشا جاردەماقى راسىمدەۋگە قۇجاتتار جيناقتالىپ، دايىندالۋدا.

ايتا كەتەيىك، مونشادا تۇراتىن وتباسى ۆيدەو مالىمەت Facebook جەلىسىندەگى Online Qazaqstan توبىندا جاريالانعان بولاتىن.

"The Qazaq Times"