Foto: El Pais

BWW BA-nıñ (Bas Assambleyası) 73-sessiyasında Irannıñ öz wstanımın aşıq bildirgenin, al amerikalıqtardıñ BWW-nıñ osı kezekti otırısında eşqanday da jetistikke qol jetkizbegenin şegeley aytqan Iran Islam Respublikasınıñ prezidenti Hasan Ruhanidiñ sözi älemdik BAQ-tıñ qızu talqısına wşırauda.

N'yu-Yorkte ötken BWW BA-nıñ 73-sessiyasınan qaytarda tilşiler swrağına jauap bergen Ruhani: «BWW Bas Assambleyasınıñ biılğı otırısındağı eñ mañızdı taqırıp — Iran Islam Respublikası sayasatınıñ dwrıstığı men AQŞ-tıñ ozbırlığına basa nazar audarıluı edi. BWW sessiyasında AQŞ-tıñ älemdik sahnadağı jalğızdığı men halıqaralıq erejelerge qayşı äreketi keñinen talqılandı. Bwnı tek biz ğana aytıp otırğan joqpız. Türli elder de bwnı ärtürli taqırıppen tilge tiek etude. Tağı da aytamın, amerikalıqtar BWW BA-nıñ biılğı sessiyasında eşqanday jetistikke jete almadı. Tipti, AQŞ prezidenti Donal'd Tramp osı jiındağı mälimdemesinde öziniñ eki jıldıq qızmetin maqtay jönelgeninde zaldağılardıñ bäri oğan du küldi. Amerikanıñ barlıq aqparat qwraldarı bwnı «AQŞ ükimeti men wltın wyatqa qaldıru» dep sanaydı» , - dedi.

Hasan Ruhani BWW BA sessiyasında Irannıñ wstanımın aşıq jariya etkenin ayta kele, Iran, Qıtay, Germaniya, Resey jäne Wlıbritaniya SİM basşılarınıñ N'yu-Yorktegi yadrolıq kelisimge qatıstı jiını turalı: « Bes el N'yu-Yorkte yadrolıq kelisimşarttıñ tolıqtay jüzege asırıluına qatıstı mindettemelerin jañarttı. EO, Iran jäne qarjılıq baylanıstarınıñ jüzege asırıluı üşin arnayı instituttıñ qwrılatının ayttı. EO Sırtqı ister boyınşa joğarı komissarı Federika Mogerini osı mehanizmniñ qaraşa ayınan bastap qolğa alınatının resmi türde habarladı», - dedi. Ol sanımen qatar, köptegen el basşılarınıñ AQŞ sankciyaların qwptamaytındıqtarın, Iranmen jwmıs istegileri keletinin de atap ötti.

“The Qazaq Times”