فوتو: El Pais

بۇۇ با-نىڭ (باس اسسامبلەياسى) 73-سەسسياسىندا يراننىڭ ءوز ۇستانىمىن اشىق بىلدىرگەنىن، ال امەريكالىقتاردىڭ بۇۇ-نىڭ وسى كەزەكتى وتىرىسىندا ەشقانداي دا جەتىستىككە قول جەتكىزبەگەنىن شەگەلەي ايتقان يران يسلام رەسپۋبليكاسىنىڭ پرەزيدەنتى حاسان ءرۋحانيدىڭ ءسوزى الەمدىك باق-تىڭ قىزۋ تالقىسىنا ۇشىراۋدا.

نيۋ-يوركتە وتكەن بۇۇ با-نىڭ 73-سەسسياسىنان قايتاردا تىلشىلەر سۇراعىنا جاۋاپ بەرگەن رۋحاني: «بۇۇ باس اسسامبلەياسىنىڭ بيىلعى وتىرىسىنداعى ەڭ ماڭىزدى تاقىرىپ — يران يسلام رەسپۋبليكاسى ساياساتىنىڭ دۇرىستىعى مەن اقش-تىڭ وزبىرلىعىنا باسا نازار اۋدارىلۋى ەدى. بۇۇ سەسسياسىندا اقش-تىڭ الەمدىك ساحناداعى جالعىزدىعى مەن حالىقارالىق ەرەجەلەرگە قايشى ارەكەتى كەڭىنەن تالقىلاندى. بۇنى تەك ءبىز عانا ايتىپ وتىرعان جوقپىز. ءتۇرلى ەلدەر دە بۇنى ءارتۇرلى تاقىرىپپەن تىلگە تيەك ەتۋدە. تاعى دا ايتامىن، امەريكالىقتار بۇۇ با-نىڭ بيىلعى سەسسياسىندا ەشقانداي جەتىستىككە جەتە المادى. ءتىپتى، اقش پرەزيدەنتى دونالد ترامپ وسى جيىنداعى مالىمدەمەسىندە ءوزىنىڭ ەكى جىلدىق قىزمەتىن ماقتاي جونەلگەنىندە زالداعىلاردىڭ ءبارى وعان دۋ كۇلدى. امەريكانىڭ بارلىق اقپارات قۇرالدارى بۇنى «اقش ۇكىمەتى مەن ۇلتىن ۇياتقا قالدىرۋ» دەپ سانايدى» ، - دەدى.

حاسان رۋحاني بۇۇ با سەسسياسىندا يراننىڭ ۇستانىمىن اشىق جاريا ەتكەنىن ايتا كەلە، يران، قىتاي، گەرمانيا، رەسەي جانە ۇلىبريتانيا ءسىم باسشىلارىنىڭ نيۋ-يوركتەگى يادرولىق كەلىسىمگە قاتىستى جيىنى تۋرالى: « بەس ەل نيۋ-يوركتە يادرولىق كەلىسىمشارتتىڭ تولىقتاي جۇزەگە اسىرىلۋىنا قاتىستى مىندەتتەمەلەرىن جاڭارتتى. ەو، يران جانە قارجىلىق بايلانىستارىنىڭ جۇزەگە اسىرىلۋى ءۇشىن ارنايى ينستيتۋتتىڭ قۇرىلاتىنىن ايتتى. ەو سىرتقى ىستەر بويىنشا جوعارى كوميسسارى فەدەريكا موگەريني وسى مەحانيزمنىڭ قاراشا ايىنان باستاپ قولعا الىناتىنىن رەسمي تۇردە حابارلادى»، - دەدى. ول سانىمەن قاتار، كوپتەگەن ەل باسشىلارىنىڭ اقش سانكتسيالارىن قۇپتامايتىندىقتارىن، يرانمەن جۇمىس ىستەگىلەرى كەلەتىنىن دە اتاپ ءوتتى.

“The Qazaq Times”