Foto: evrensel.net

Eger Uaşington sankciyalıq qısımın jalğastıra beretin bolsa, Iran Islam Respublikası Ormuz bwğazın jauıp tastauı mümkin. Bwl turalı Iran prezidenti Hasan Ruhani NBC-ge bergen swhbatında mälimdedi, - dep jazadı "dw.com/tr".

«Bwl — eşqanday da eskertu emes. Bwl — şındıq. Eger Parsı şığanağınıñ teñiz jolı aşıq äri qauipsiz qaluı tiis bolsa, onda ol bäri üşin sonday boluı kerek», - degen Ruhani. Bwğan deyin de habarlağanımızday, Irannıñ Ahvaz qalasındağı terakt üşin Iran AQŞ pen öziniñ körşilerin, atap aytar bolsaq Saud-Arabiyası, BAÄ jäne Bahreyn elderin kinalağan edi. Al, Uaşington bolsa öz kezeginde Tehranğa terrorizmdi qarjılandıradı degen ayıp taqqan bolatın. AQŞ-tıñ Iranğa qarsı jaña sankciyalarınan soñ Tehran amerikalıq sayasatqa qatañ sıni mälimdeme jasap, jauap bergen edi.

Eske salayıq, Ormuz bwğazınıñ soltüstik jağalauı (Oman men Parsı şığanağınıñ arası) Iranğa, oñtüstik jağalauı — BAÄ men Omanğa tiesili. Sonday-aq, strategiyalıq jäne tranzittik ülken mañızğa ie aumaq Parsı şığanağı elderinen Japoniyağa, AQŞ-qa jäne Batıs Europağa mwnay men gaz eksporttalatın birden-bir teñiz jolı.

“The Qazaq Times”