Foto: lemonde.fr

Italiya men Mal'ta arasında şielenis tuındatqan bosqındardı Ispaniya ükimeti qabıldağanmen, Europadağı bosqındar mäselesi uşığa tüsude. Müşe-elderge sözin ötkize almağan Europa Odağı osı mäselege qatıstı daudı retteuge tırısqanmen, endi resmi Rim men Parij arasında diplomatiyalıq dau payda boldı.

Franciya men Italiya arasındağı teketires qalay bastaldı?

Eki el arasındağı dau Franciya prezidenti Emmanuel' Makronnıñ Italiya ükimetin EO-tıñ aldındağı jauapkerşilikten jaltarıp, onıñ şarttarın elemeude dep ayıptauınan bastaldı. Osınday mälimdeme jasağan ol Italiyanı halıqaralıq zañdarğa bağınuğa şaqırdı. Onıñ bwl mälimdemesine aşulanğan Italiya prem'er-ministri Djuzeppe Konte: «Franciya bosqındarğa qatıstı älemde orın alıp jatqan mäselelerden beyhabar. Bosqındarğa qatıstı mäsele tuındağanda, sırt aynaladı. Solay bola twra, osınday ekijüzdi elderdiñ aqıl aytqandarı jarasımsız» , - dedi. Sonımen qatar, Franciyanıñ Rimdegi elşisin Italiya sırtqı ister ministrligine şaqırıp, Makronnıñ mälimdemelerine qatıstı eskertuler jasadı. Bwdan bölek, Italiya İşki ister ministri Matteo Sal'vini: «Franciya Italiyadan resmi türde keşirim swramayınşa, prem'er-ministr Konte Makronmen kezdesu turalı şeşimin bwzadı», - dedi.

Bosqındar mäselesi Germaniyada da işki ereges tudıruda

Germaniyadağı Ükimettik odaqtıñ oñ qanatı da bosqındarğa qatıstı qatal sayasat wstanu maqsatında kancler Angela Merkel'ge qısım körsetude. Al, Merkel' öz kezeginde osı mäselege qatıstı şaralar jekelegen elder tarapınan emes, Eurodaqqa müşe barlıq memleketter tarapınan qabıldanatının aytıp, retteuge tırısqanmen, odaq küşteri eldegi sayasi jağdaydı tım uşıqtırıp jiberdi, dep habarlaydı francuzdıñ liberation.fr basılımı.

Ras, bosqındar turalı mäseleniñ kesirinen Europa Odağı (EO) qazir şarasız jağdayda. Esteriñizde bolsa, odaqtıñ şarttarına bağınbağan Italiya ükimeti  629 bosqını bar «Aquarius» kemesine porttarın jauıp tastau arqılı Europada şielenisti jağday tuındatqan bolatın. Italiya men Mal'ta birin-biri halıqaralıq zañdardı ayaq astı etti dep ayıptadı. Aqırı bwl jağdayğa Ispaniya aralasıp, atalğan kemeni qabıldadı. Italiya özin sınağan odaq müşelerine qarsılıq bildirip, bosqındar mäselesindegi wstanımın özgertpeytinin mälimdedi.  Ayta ketu kerek, Tayau Şığıs pen Afrikada 2011 jılı bastalğan qaqtığıstar EO territoriyasına bosqındardıñ ağıluına jol aştı.

“The Qazaq Times”