بوسقىندار ماسەلەسى تاعى ەكى ەلدىڭ ارا-قاتىناسىنا سىزات ءتۇسىردى

يتاليا مەن مالتا اراسىندا شيەلەنىس تۋىنداتقان بوسقىنداردى يسپانيا ۇكىمەتى قابىلداعانمەن، ەۋروپاداعى بوسقىندار ماسەلەسى ۋشىعا تۇسۋدە. مۇشە-ەلدەرگە ءسوزىن وتكىزە الماعان ەۋروپا وداعى وسى ماسەلەگە قاتىستى داۋدى رەتتەۋگە تىرىسقانمەن، ەندى رەسمي ريم مەن پاريج اراسىندا ديپلوماتيالىق داۋ پايدا بولدى.

فرانتسيا مەن يتاليا اراسىنداعى تەكەتىرەس قالاي باستالدى؟

ەكى ەل اراسىنداعى داۋ فرانتسيا پرەزيدەنتى ەممانۋەل ماكروننىڭ يتاليا ۇكىمەتىن ەو-تىڭ الدىنداعى جاۋاپكەرشىلىكتەن جالتارىپ، ونىڭ شارتتارىن ەلەمەۋدە دەپ ايىپتاۋىنان باستالدى. وسىنداي مالىمدەمە جاساعان ول يتاليانى حالىقارالىق زاڭدارعا باعىنۋعا شاقىردى. ونىڭ بۇل مالىمدەمەسىنە اشۋلانعان يتاليا پرەمەر-ءمينيسترى دجۋزەپپە كونتە: «فرانتسيا بوسقىندارعا قاتىستى الەمدە ورىن الىپ جاتقان ماسەلەلەردەن بەيحابار. بوسقىندارعا قاتىستى ماسەلە تۋىنداعاندا، سىرت اينالادى. سولاي بولا تۇرا، وسىنداي ەكىجۇزدى ەلدەردىڭ اقىل ايتقاندارى جاراسىمسىز» ، - دەدى. سونىمەن قاتار، فرانتسيانىڭ ريمدەگى ەلشىسىن يتاليا سىرتقى ىستەر مينيسترلىگىنە شاقىرىپ، ماكروننىڭ مالىمدەمەلەرىنە قاتىستى ەسكەرتۋلەر جاسادى. بۇدان بولەك، يتاليا ىشكى ىستەر ءمينيسترى ماتتەو سالۆيني: «فرانتسيا يتاليادان رەسمي تۇردە كەشىرىم سۇرامايىنشا، پرەمەر-مينيستر كونتە ماكرونمەن كەزدەسۋ تۋرالى شەشىمىن بۇزادى»، - دەدى.

بوسقىندار ماسەلەسى گەرمانيادا دا ىشكى ەرەگەس تۋدىرۋدا

گەرمانياداعى ۇكىمەتتىك وداقتىڭ وڭ قاناتى دا بوسقىندارعا قاتىستى قاتال ساياسات ۇستانۋ ماقساتىندا كانتسلەر انگەلا مەركەلگە قىسىم كورسەتۋدە. ال، مەركەل ءوز كەزەگىندە وسى ماسەلەگە قاتىستى شارالار جەكەلەگەن ەلدەر تاراپىنان ەمەس، ەۋروداققا مۇشە بارلىق مەملەكەتتەر تاراپىنان قابىلداناتىنىن ايتىپ، رەتتەۋگە تىرىسقانمەن، وداق كۇشتەرى ەلدەگى ساياسي جاعدايدى تىم ۋشىقتىرىپ جىبەردى، دەپ حابارلايدى فرانتسۋزدىڭ liberation.fr باسىلىمى.

راس، بوسقىندار تۋرالى ماسەلەنىڭ كەسىرىنەن ەۋروپا وداعى (ەو) قازىر شاراسىز جاعدايدا. ەستەرىڭىزدە بولسا، وداقتىڭ شارتتارىنا باعىنباعان يتاليا ۇكىمەتى  629 بوسقىنى بار «Aquarius» كەمەسىنە پورتتارىن جاۋىپ تاستاۋ ارقىلى ەۋروپادا شيەلەنىستى جاعداي تۋىنداتقان بولاتىن. يتاليا مەن مالتا ءبىرىن-ءبىرى حالىقارالىق زاڭداردى اياق استى ەتتى دەپ ايىپتادى. اقىرى بۇل جاعدايعا يسپانيا ارالاسىپ، اتالعان كەمەنى قابىلدادى. يتاليا ءوزىن سىناعان وداق مۇشەلەرىنە قارسىلىق ءبىلدىرىپ، بوسقىندار ماسەلەسىندەگى ۇستانىمىن وزگەرتپەيتىنىن مالىمدەدى.  ايتا كەتۋ كەرەك، تاياۋ شىعىس پەن افريكادا 2011 جىلى باستالعان قاقتىعىستار ەو تەرريتورياسىنا بوسقىنداردىڭ اعىلۋىنا جول اشتى.

“The Qazaq Times”