Erdoğan äskeri qosınğa bardı. Foto: Telegraf.

Jaqında Türkiya qarulı küşteri Süriyanıñ Afrin aymağına kirip, «Zäytün bwtağı» dep atalatın äskeri operaciyasın bastadı. Keşe Türkiya prezidenti Rejep Tayıp Erdoğan mälimdemesinde, «Zäytün bwtağı» operaciyasınıñ bastı maqsatı Süriyanıñ jerin basıp alu emes, kerisinşe süriyalıq bosqındardı eline qaytaruğa kömektesu ekenin ayttı. Bwl turalı «Şinlañ» aqparattıq saytı türik basılımdarına silteme bere otırıp habarladı.

Türkiyanıñ «Anadolı» aqparat agenttigi arqılı taratılğan mälimdemede, Türkiya basşısı: «Bizdiñ maqsatımız Süriyanıñ jerin basıp alu emes, qayta Türkiyağa bas sauğalay kelgen 3,5 mln Süriya bosqındarınıñ otanına qaytuına kömektesu», – degen. Ol jäne jergilikti twrğındar aymaqta twraqtılıqtı qamtamasız etkeni üşin türik armiyasına rahmet aytqanın bildirdi. Onıñ aytuınşa, Türkiya armiyası Süriya azamattarınıñ müddesin qorğau bağıtında Afrindegi terrorlıq toptardıñ közin joyu üşin äreket jasauda.

Süriyanıñ soltüstiginde kürdter köbirek qonıstanğan. Olardıñ «Halıqtıñ özin özi qorğau qosını» (YPG) dep atalatın qarulı tobı aymaqtağı salmaqtı küşterdiñ biri. Ankara biligi ötken ğasırdıñ 80 jıldarınan beri Türkiyadan avtonomiyalıq derbestik aludı swrap kele jatqan Kürd Jwmısşılar Partiyasımen atalğan qarulı toptıñ ımıralastığı bar dep sanaydı. Bwl toptardıñ küşeyip, el işindegi qayşılıqtar men qarsı toptarmen birigip Türkiyanıñ wlttıq qauipsizdigine qater töndiruden alañdap, atalğan äskeri qadamdardı jasadı.

Onıñ üstine Süriyadan bas sauğalap barğan 3,5 mln bosqın, büginde Türkiyanıñ bas qatıratın mañızdı problemalarınıñ biri bolıp otır. Bosqındardı eline qaytaru jäne wlttıq qauipsizdik pen territoriya twtastığın bekemdeu üşin Türkiya biligine bwl äskeri qadamnıñ tabıstı boluı öte mañızdı. Degenmen, Süriyağa qarulı qosınmen basıp kiruin ayıptağan elder men halıqaralıq wyımdar da köp.

“The Qazaq Times”