Түркия президенті Режеп Тайып Ердоған. Фото: Анатолы.

Түркия президенті Режеп Тайып Ердоған Астанада өткен Сүрия келіссөзі бойынша шешімдер Идлиб қаласында атқарыла бастағанын айтты. Бұл туралы сол елдің «Анатолы» ақпараттық агенттігінің ресми сайты жазды.

Ердоған Әділет және даму партиясының 26-шы кезекті ақылдасу отырысы кезінде сөйлеген сөзінде Халлебтегі тұрғындардың баррел бомбалары арқылы жасалған шабуылдан бой тасалап, Идлибке қашуға мәжбүр болғаны туралы айта келіп, қазіргі Идлибтегі күрделі мәселелер туралы тоқталып өтті. Сонымен бірге Ердоған сөзінде Түркияның Сүриядағы саясаты Ресей мен Иран жағында екенін баса айтты.

Түрік елінің президенті сөзінде: «Ресейдің сырттай қолдауымен, Түркия өңірдегі Еркін Сүрия армиясымен бірге әрекеттер жасауда. Сол арқылы аталған аймақта Астана келісімінің шешімдері атқарыла бастады», - деді. Ол сөзінің соңында Африннен Жер Орта теңізіне жалғасатын террорлардың жолын Түркия билігі қатаң түрде тосатынын мәлімдеді.

“The Qazaq Times”