Foto: Getty Images

Reseydiñ Qorğanıs ministri Sergey Şoygu Süriyadağı äskerdiñ bir böligin elge qaytaru operaciyası bastalatının habarladı. Resmi mälimdeme düysenbi küni  Vladimir Putinniñ Süriyağa saparı kezindegi şeşiminen keyin jasaldı. Resey Prezidenti ötken jılı da osığan wqsas mälimdeme jasağanımen, Süriyadağı äskeri operaciya jalğasqan bolatın. Bwl turalı VVS aqparattıq agenttigi jazdı. 

"Reseyge Süriyadan äskerin tolıqtay şığaru üşin qanşa uaqıt kerek?" degen saualğa Sergey Şoygu: "Bwl Süriyadağı jağdayğa baylanıstı", - dep jauap berdi. Vladimir Putin Başar Asadpen Reseydiñ "Hmeimim" äskeri bazasında ötken kezdesu barısında: "Men Reseydiñ Qorğanıs ministri men bas ştabtıñ basşısına Süriyadağı äskerdiñ negizgi böligin olardıñ eldegi twraqtı bazalarına qaytarudı tapsıramın", - dep habarladı.

Juırda ğana öziniñ Reseyde ötetin Prezident saylauına qatısatının jariyalağan Vladimir Putinniñ Süriyadağı äskerdi qaytaruğa jasağan qadamı dauıs beruşiler tarapınan jaqsı bağalanuı mümkin. Resey Süriyadağı terrorlıq toptıñ küşterine qarsı küreske aytarlıqtay üles qosqan memleket esebinde älem sahnasında öziniñ ıqpalın saqtap qaldı. Qırım oqiğasınan keyin Reseyden teris aynalğan Batıs memleketterine Süriya mäselesi boyınşa kelissözder üstelinde Mäskeumen pikir almasuğa tura keldi. Sarapşılardıñ pikirinşe, Vladimir Putinniñ tağı bir jeñisi - onıñ öz odaqtası Başar Asadtıñ biligin saqtap qaluında.

Vladimir Putin Başar Asadpen kezdesu barısında Süriyadağı Oppoziciyalıq küştermen beybit kelisimderge kelu üşin, Iran jäne Türkiyamen birlesken jwmıstardı jalğastıratının jetkizdi. Esteriñizge sala keteyik, Resey Süriyanıñ memleket basşısı Başar Asad bastağan memlekettik küşterdi "Islam memleketi" lañkestik wyımına qarsı küreste qoldau üşin 2015 jılı soğısqa aralasqan bolatın.

“The Qazaq Times”