فوتو: Getty Images

رەسەيدىڭ قورعانىس ءمينيسترى سەرگەي شويگۋ سۇرياداعى اسكەردىڭ ءبىر بولىگىن ەلگە قايتارۋ وپەراتسياسى باستالاتىنىن حابارلادى. رەسمي مالىمدەمە دۇيسەنبى كۇنى  ۆلاديمير ءپۋتيننىڭ سۇرياعا ساپارى كەزىندەگى شەشىمىنەن كەيىن جاسالدى. رەسەي پرەزيدەنتى وتكەن جىلى دا وسىعان ۇقساس مالىمدەمە جاساعانىمەن، سۇرياداعى اسكەري وپەراتسيا جالعاسقان بولاتىن. بۇل تۋرالى ۆۆس اقپاراتتىق اگەنتتىگى جازدى. 

"رەسەيگە ءسۇريادان اسكەرىن تولىقتاي شىعارۋ ءۇشىن قانشا ۋاقىت كەرەك؟" دەگەن ساۋالعا سەرگەي شويگۋ: "بۇل سۇرياداعى جاعدايعا بايلانىستى", - دەپ جاۋاپ بەردى. ۆلاديمير پۋتين باشار اسادپەن رەسەيدىڭ "حمەيميم" اسكەري بازاسىندا وتكەن كەزدەسۋ بارىسىندا: "مەن رەسەيدىڭ قورعانىس ءمينيسترى مەن باس شتابتىڭ باسشىسىنا سۇرياداعى اسكەردىڭ نەگىزگى بولىگىن ولاردىڭ ەلدەگى تۇراقتى بازالارىنا قايتارۋدى تاپسىرامىن", - دەپ حابارلادى.

جۋىردا عانا ءوزىنىڭ رەسەيدە وتەتىن پرەزيدەنت سايلاۋىنا قاتىساتىنىن جاريالاعان ۆلاديمير ءپۋتيننىڭ سۇرياداعى اسكەردى قايتارۋعا جاساعان قادامى داۋىس بەرۋشىلەر تاراپىنان جاقسى باعالانۋى مۇمكىن. رەسەي سۇرياداعى تەررورلىق توپتىڭ كۇشتەرىنە قارسى كۇرەسكە ايتارلىقتاي ۇلەس قوسقان مەملەكەت ەسەبىندە الەم ساحناسىندا ءوزىنىڭ ىقپالىن ساقتاپ قالدى. قىرىم وقيعاسىنان كەيىن رەسەيدەن تەرىس اينالعان باتىس مەملەكەتتەرىنە ءسۇريا ماسەلەسى بويىنشا كەلىسسوزدەر ۇستەلىندە ماسكەۋمەن پىكىر الماسۋعا تۋرا كەلدى. ساراپشىلاردىڭ پىكىرىنشە، ۆلاديمير ءپۋتيننىڭ تاعى ءبىر جەڭىسى - ونىڭ ءوز وداقتاسى باشار اسادتىڭ بيلىگىن ساقتاپ قالۋىندا.

ۆلاديمير پۋتين باشار اسادپەن كەزدەسۋ بارىسىندا سۇرياداعى وپپوزيتسيالىق كۇشتەرمەن بەيبىت كەلىسىمدەرگە كەلۋ ءۇشىن، يران جانە تۇركيامەن بىرلەسكەن جۇمىستاردى جالعاستىراتىنىن جەتكىزدى. ەستەرىڭىزگە سالا كەتەيىك، رەسەي ءسۇريانىڭ مەملەكەت باسشىسى باشار اساد باستاعان مەملەكەتتىك كۇشتەردى "يسلام مەملەكەتى" لاڭكەستىك ۇيىمىنا قارسى كۇرەستە قولداۋ ءۇشىن 2015 جىلى سوعىسقا ارالاسقان بولاتىن.

“The Qazaq Times”