Sıbaylas jemqorlıqpen ayıptalğan Makao milliarderi. Foto: The Wall Street Journal.

Manhettende bir federaldıq qazılar alqası keşe, 27 şilde küni bekitken qararında, Makaon milliarderi U Lişıñdı BWW-nıñ Karib elderinde twratın ökilderine para berdi dep ayıptadı. Bwl isten keyin Birikken Wlttar Wyımındağı Qıtaylıq isker twlğalardıñ menmendigi älem nazarın özine audardı. Aytalıq, bwl is BWW twlğaları arasındağı sıbaylas jemqorlıqtıñ tereñdep ketkenin körsetti. Bwl turalı «The Wall Street Journal» basılımı habarlap otır.

Qazılar alqası bir täulikke tayau uaqıt pikirtalastan keyin osı şeşimdi şığardı. 2015 jılı prokuratura paraqorlıq jäne aqşa jılıstatu küdigimen altı adamğa ayıp taqtı. Olardıñ arasında Qıtaylıq iri biznesmender men sol elde twratın BWW ökiletti twlğaları jäne BWW-ğa qarastı kommerciyalıq emes wyımdardıñ adamdarı da bar edi.

Al, 69 jastağı U Lişiñ bwl retki qazılar şeşimindegi birden bir ayıptaluşı bolıp tabıldı. Sıbaylas jemqorlıq boyınşa özge ayıptaluşılar osığan deyin kinäsin moyındağan nemese ömirden ozğan. U Lişiñ üstinen jeti birley ayıp tağılıp otır. Aytalıq, paraqorlıq, aqşanı jılıstatu, özge elderdiñ zañın bwzu jäne salıqtan jaltaru qatarlı ayıptar da bar.

Federaldıq sot oğan 65 jıldıq qamaq jazası berui mümkin eken. Qazirge onıñ jürip twruı uaqıtşa şektelgen. Rwhsatsız Manhettendegi päterinen şığuına tiım salınğan. Ol jäne $ 50 mln kepilgerlik aqşasın tapsıruğa tiis. Oğan joğarıdağı ayıptardıñ küdigi ilingen soñğı eki jılda üy qamaqta wstalğan.

Makaolıq qaltalınıñ jeke advokatı bwl is turalı jurnalister swrağınan jaltardı. U Lişiıñ QHR sayasi keñesiniñ müşesi bolıp sanaladı. Al, AQŞ-tağı Qıtaydıñ bas elşiligi de bwl is turalı swraularğa jauap beruden bas tartqan. BWW-nıñ tergeudi baqılauşı ökilderi de jurnalisterden jaltardı.

“The Qazaq Times”