سىبايلاس جەمقورلىقپەن ايىپتالعان ماكاو ميللياردەرى. فوتو: The Wall Street Journal.

مانحەتتەندە ءبىر فەدەرالدىق قازىلار القاسى كەشە، 27 شىلدە كۇنى بەكىتكەن قارارىندا، ماكاون ميللياردەرى ۋ ليشىڭدى بۇۇ-نىڭ كاريب ەلدەرىندە تۇراتىن وكىلدەرىنە پارا بەردى دەپ ايىپتادى. بۇل ىستەن كەيىن بىرىككەن ۇلتتار ۇيىمىنداعى قىتايلىق ىسكەر تۇلعالاردىڭ مەنمەندىگى الەم نازارىن وزىنە اۋداردى. ايتالىق، بۇل ءىس بۇۇ تۇلعالارى اراسىنداعى سىبايلاس جەمقورلىقتىڭ تەرەڭدەپ كەتكەنىن كورسەتتى. بۇل تۋرالى «The Wall Street Journal» باسىلىمى حابارلاپ وتىر.

قازىلار القاسى ءبىر تاۋلىككە تاياۋ ۋاقىت پىكىرتالاستان كەيىن وسى شەشىمدى شىعاردى. 2015 جىلى پروكۋراتۋرا پاراقورلىق جانە اقشا جىلىستاتۋ كۇدىگىمەن التى ادامعا ايىپ تاقتى. ولاردىڭ اراسىندا قىتايلىق ءىرى بيزنەسمەندەر مەن سول ەلدە تۇراتىن بۇۇ وكىلەتتى تۇلعالارى جانە بۇۇ-عا قاراستى كوممەرتسيالىق ەمەس ۇيىمداردىڭ ادامدارى دا بار ەدى.

ال، 69 جاستاعى ۋ ليشيڭ بۇل رەتكى قازىلار شەشىمىندەگى بىردەن ءبىر ايىپتالۋشى بولىپ تابىلدى. سىبايلاس جەمقورلىق بويىنشا وزگە ايىپتالۋشىلار وسىعان دەيىن كىناسىن مويىنداعان نەمەسە ومىردەن وزعان. ۋ ليشيڭ ۇستىنەن جەتى بىرلەي ايىپ تاعىلىپ وتىر. ايتالىق، پاراقورلىق، اقشانى جىلىستاتۋ، وزگە ەلدەردىڭ زاڭىن بۇزۋ جانە سالىقتان جالتارۋ قاتارلى ايىپتار دا بار.

فەدەرالدىق سوت وعان 65 جىلدىق قاماق جازاسى بەرۋى مۇمكىن ەكەن. قازىرگە ونىڭ ءجۇرىپ تۇرۋى ۋاقىتشا شەكتەلگەن. رۇحساتسىز مانحەتتەندەگى پاتەرىنەن شىعۋىنا تيىم سالىنعان. ول جانە $ 50 ملن كەپىلگەرلىك اقشاسىن تاپسىرۋعا ءتيىس. وعان جوعارىداعى ايىپتاردىڭ كۇدىگى ىلىنگەن سوڭعى ەكى جىلدا ءۇي قاماقتا ۇستالعان.

ماكاولىق قالتالىنىڭ جەكە ادۆوكاتى بۇل ءىس تۋرالى جۋرناليستەر سۇراعىنان جالتاردى. ۋ ليشيىڭ قحر ساياسي كەڭەسىنىڭ مۇشەسى بولىپ سانالادى. ال، اقش-تاعى قىتايدىڭ باس ەلشىلىگى دە بۇل ءىس تۋرالى سۇراۋلارعا جاۋاپ بەرۋدەن باس تارتقان. بۇۇ-نىڭ تەرگەۋدى باقىلاۋشى وكىلدەرى دە جۋرناليستەردەن جالتاردى.

“The Qazaq Times”