Foto: neftegaz.ru

OPEK elderinde öndirilgen mwnay kölemi  bir ğana mausım ayında 260 mıñ barrel'ge artqan. Bwl - ağımdağı jılı  tirkelgen eñ ülken körsetkiş, dep habarlaydı Bloomberg.

Älemdik mwnay narığında alañdauşılıq tudırğan ösimniñ jartısı Liviya men Nigeriyağa tiesili. Liviyada 2017 jıldıñ basında täuligine 690 mıñ barrel' mwnay öndirilse, endi bwl körsetkiş million barrel'den asıp otır. 2016 jılı 30 qaraşada OPEK elderi mwnaydıñ täuliktik öndiris kölemin 1,2 mln barrel'ge, al wyımğa müşe emes özge memleketter 558 mıñ barrel'ge   qısqartu turalı kelisimge qol qoyğan bolatın. Atap ötu kerek,  bwl mindettemeni qabıldağan elderdiñ qatarında Liviya men Nigeriya joq.

Atalğan kelisim küşine engennen keyin, 2017 jılı Brent sapasındağı  mwnay bağası köterilip, 58 dollarğa twraqtadı. Degenmen kelisim üsteline otırğan Saud Arabiyası bwrınğı mejeden täuligine 90 mıñ, Angola men Birikken Arab Ämirlikteri 40 mıñ barrel'ge artıq mwnay öndire bastauı älemdik narıqtağı qara altın qwnınıñ 4 şildede tirkelgen derek boyınşa 49,5 dollarğa tüsuine sebep boldı.

Tağı bir mañızdı derek, OPEK elderinen twratın mwnay öndiruşi negizgi kartel'diñ qwramına osı jıldıñ mamır ayında Ekvatorial'dı Gvineyanıñ qabıldanuı wyımnıñ jalpı öndiris kölemin 150 mıñ barrel'ge arttırğan.

“The Qazaq Times”